भांगरभूंय | प्रतिनिधी
भांगरभूंय । प्रतिनिधी
पोरणे गोंयः ग्रामसभेची मान्यताय घेनास्तना कुडका पंचायत मंडळान आपलो अर्थसंकल्प पास केल्ले खातीर फाटल्या आयतारा जाल्ले कुडकाचे ग्रामसभेंत लोकांनी पंचायत मंडळाचेर फोग काडलो. सुमार स म्हयन्यां उपरांत जाल्ली ही ग्रामसभा व्हो एक विशय सोडल्यार शांततायेन जाली.
ग्रामसभेक विस्वासांत घेनास्तना पंचायत मंडळान पास केल्ल्ल्या अर्थसंकल्पाचो प्रश्न मिथिलेश कुट्टीकार हाणे काडलो. अर्थसंकल्पांतल्या तजविजी विशीं ग्रामसभेंत चर्चा कित्याक केली ना अशें ताणे सरपंचाक विचारलें. पंचायत मंडळाच्या पंद्रशी बसकेंत अर्थीक तजविशींक मान्यताय दिली अशें सरपंचान सांगल्या उपरांत कुट्टीकार आनी हेरांनी ताका आक्षेप घेतलो. ग्रामसभेंत अर्थसंकल्पाचेर चर्चा करप गरजेचें आसा हें तांणी लोकांचे नदरेक हाडून दिलें. ही चर्चा करपाक ग्रामसभा कित्याक घेतली ना असो प्रश्न ताणी सरपंचांक केलो. आपूण फाटल्या मार्च म्हयन्यांत सरपंच जालां अशी म्हायती लीना नायकान तांका दिली.
फकत अर्थसंकल्पाचेर चर्चा करपा खातीर खासा ग्रामसभा घेवपाची सूचोवणी डॉ कोरगांवकार हाणे केली. ती पंचायत मंडळान आनी लोकांनी मानून घेतली. घरपट्टेचेर आदारून कोयर एकठांय करपाची फी घेवची न्हय अशी सूचोवणी कुर्टीकारान केली. जीएमसी क्वॉटर्स, संरक्षण आनी हेर आस्थापना कुडका पंचायतीचे हद्दींत येतात. ताचे कडल्यान कोयर फी घेवपाची गरज ताणे उक्तायली. सगल्या आस्थापनांचो सर्वे करून उपरांत तांका कोयर फी लागू करपाची सूचोवण ताणे केली.
कुडका वझऱ्याचो वाठार भारतीय पुरातत्व सर्वेचो दाज वाठार म्हणून जाहीर करचो हे खातीर पंचायत मंडळान यत्न करचे अशें मंगेश कुट्टीकारान ग्रामसभेंत मागलें. 10व्या शतमानांतल्या ह्या वझऱ्याचें संवर्धन करपाची गरज आसा आनी पुरातत्व सर्वे कडल्यान तें काम बरे भशेन जातलें अशें ताणे सांगलें. पंचायत वाठारांत उदकाची सारकी पुरवण जायना तो विशय बांदकाम खात्याच्या उदका पुरवण विभागा कडेन व्हरपाचें सरपंच लीना नायकान मानून घेतलें. लोकांनी सहकार्य केल्यार दर म्हयन्यांत ग्रामसभा घेवपाची आपली तयारी आसा असें तिणे ग्रामसभे उपरांत पत्रकारांक सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
