भांगरभूंय | प्रतिनिधी
मुख्यमंत्री: प्रधानमंत्री राष्ट्रीय रोजगार प्रशिक्षण मेळाव्याक बरो प्रतिसाद
दिवचल: दरेकल्याक काम मेळचे खातीर नवी कुशळटाय विकसीत करतना उत्कृश्ठ मानव संसाधन निर्माण करप हो प्रधानमंत्री नरेंद्र मोदी हांचो संकल्प आशिल्ल्यान विवीध मळांचेर रोजगाराच्यो खूब संदी आसात. येवपी पांच वर्सां मोपा विमानतळ पर्यटन उदरगत तशेंच हेर जायत्या माध्यमांतल्यान सुमार दोन लाख नोकर्यो उपलब्ध जातल्यो. तरणाट्यांनी नवी कुशळटाय तशेंच तंत्रज्ञान विकसीत करीत आपल्या ज्ञानांत भर घालची. ते खातीर संदूय चलून येतली, अशें मुख्यमंत्री डॉ. प्रमोद सावंत हांणी सांगलें.
गोंय सरकाराच्या कुशळटाय विकास संचालनालय आनी प्रधानमंत्री
राष्ट्रीय रोजगार प्रशिक्षण मेळाव्या खाला आयटीआयच्या सहकार्यान सांखळेच्या रवींद्र भवनांत रोजगार मेळाव्याचें आयोजन केल्लें.
नवी कुशळटाय आनी शिक्षण मेळोवन स्वताक चड सक्रीय दवरपाक दरेकल्यान तयारी करची. फुडाराक पर्यटन आनी हेर जायत्या मळार व्हड संदी मेळटल्यो. सरकारी नोकरेचो आग्रो करूं नाकात. आशिल्ल्या जायत्या संदींचो फायदो घेयात आनी प्रशिक्षण घेवन तयारी करात.
– मुख्यमंत्री डॉ. प्रमोद सावंत
ह्या वेळार माचयेर भाजप मंडळ अध्यक्ष गोपाळ सुर्लकार, उपनगराध्यक्ष आनंद काणेकार, ब्रम्हानंद देसाय, विठोबा घाडी तशेंच अधिकारी वर्ग आनी विवीध कंपनी अधिकारी हाजीर आशिल्ल्यो.
व्हडा प्रमाणांत पगार मेळटलो अशी अपेक्षा करूं नाकात. तुमचे योग्यतायेचें मोल तुमकां मेळटलें असो विस्वास दवरून वावरत रावचें. सरकार सगळे तरेचें सहकार्य करपाक तयार आसा अशें मुख्यमंत्र्यान फुडें म्हणलें.
ह्या रोजगार मेळाव्यांत 56 विवीध कंपनीनी वांटो घेवन शेकड्यांनी भुरग्यांक मुळाव्या पांवड्यार प्रशिक्षणार्थी रोजगार उपलब्ध केल्ल्याचें ह्या वेळार सांगलें.
सोब सारकें काम दिवप हो आमचो हेत आशिल्ल्यान ते नदरेन केंद्र आनी राज्य सरकार सगळे तरेन यत्न करता. हे खातीर सगळ्यांनी सहकार्य दिवचें असो उलो मुख्यमंत्र्यान मारलो.
ह्या वेळार खुबश्या कंपनीनी आपले तांकी प्रमाण प्रशिक्षीत आनी प्रशिक्षणा खातीर तरणाट्यांची नेमणूक केली.
विवीध मळावेले मानेस्त तशेंच व्हडा संख्येन आयटीआय आनी हेर विद्यार्थी, प्रशिक्षणार्थी ह्या वेळार हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
