भांगरभूंय | प्रतिनिधी
मुरगांवः वास्को स्वतंत्रपथ मार्गाचेर 11 जूनाक फांतोडेर अशोकाचें झाड हुमटून पडलें. तातूंत एका रेंट अ कारीचें लुकसाण जालें. जाल्यार मांगूरहील वाठारांत एक झाड पडिल्ल्यान तीन गाडयांचें लुकसाण जालें.
शेनवारा सांजेच्यान पडिल्ल्या पावसाक लागून लोकजीण विस्कळीत जाली. गडगड मारून पडिल्ल्या पावसाक लागून ल्हान- व्हड झाडां पडिल्ल्याच्यो घडणुको घडल्यो. तातूंत रातच्या 12 वरांचेर मांगूरहील वाठारांत मांगूर स्पोर्टस् क्लबा लागसार एक झाड हुमटून पडिल्ल्यान तीन गाडयांचें लुकसाण जालें. तातूंत दिनेश गुरव हांची किया सोनेट मोटार (जीए 06 के 2407), मनोज गुहा हांची होंडा सिटी मोटार (जीए 06 डी 9232) आनी सीयाराम सिंग हांची स्विफ्ट डिझायर मोटार (जीए 06 डी 2520) हांचो आस्पाव आशिल्लो. तिनूय गाडयांचें मेळून सुमार पाच लाख रुपयांचें लुकसाण जालें.
मजगतीं, दुसरे एके घडणुकेंत 11 जूनाक फांतोडेर 6.15 वरांच्या सुमाराक स्वतंत्रपथ मार्गार अशोकाचें झाड हुमटून पडलें. तातूंत झाडा कुशीक दवरिल्ल्या बलेनो मोटारीचें (जीए 06 ई 9414) 35 हजारांचें लुकसाण जाले. मजगतीं, स्वतंत्रपथ मार्गाचेर आनीक कांय अशोकाचीं झाडां घातक स्थितींत आसात आनी तीं केन्नाय हुमटून पडूं येतात. लोकांनी ह्या मार्गा वयल्यान वतना सादुरकाय बाळगुची, तशेंच ह्या झाडां कडेन गाडयो दवरच्यो न्हय, अशें समाज वावुरपी शंकर पोळजी हांणी म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
