भांगरभूंय | प्रतिनिधी
कंत्राटदाराचे मनमानी लागून सगळ्यांकूच त्रास
भांगरभूंय । प्रतिनिधी
पेडणें: मांद्रें मतदारसंघांतले रस्ते पयल्याच पावसांत घातक जाल्यात. खूबशा रस्त्यांचेर गाडयो मुंगारपाचे प्रकार घडटात. पयल्याच पावसांत जुनसवाडो मांद्र्यां रस्त्याच्या मदींच ट्रक मुंगरिल्ल्यान ताचो येरादारीचेर परिणाम जालो.
मतदारसंघांतली वीज समस्या सासणाची सोडोवचे खातीर मांद्रें मतदारसंघाचे आमदार जीत आरोलकार हांणी सरकार दरबारांत यत्न करून वीज मंत्री सुदिन ढवळीकार, मुख्यमंत्री डॉ. प्रमोद सावंत हांचे मजतीन पुराय मतदारसंघांत भुंयगत वीज केबल घालपा खातीर प्रक्रिया पुराय केली. भुंयगत वीज केबल तुयें ते मांद्रें जुनसवाड्या मेरेन घालतना कंत्राटदारान मनमानी पद्दतीन अर्दो अदीक रस्तो फोडून वीज केबल घातले. हो रस्तो खणटतना कोणेच विरोध करूंक ना. वीज समस्या सुटावी जातली म्हूण लोकूय ओगी रावले. ताचे परिणाम आतां वाहन चालकांक आनी रस्त्याचे कुशीक आशिल्ल्या घरांक सोंसचे पडटात.
चोपडें, आगरवाडो, तुयें, पार्सें, मांद्रें ह्या वाठारांत व्हड प्रमाणांत रस्ते खणल्यात. आमदार आरोलकार हांणी यत्न करून खणिल्ले रस्ते माती घालून पुरोवपाचो यत्न केल्लो. तीं फोंडकुलां पावसाळ्यांत आनीक व्हड जावन घातक जावपाची शक्यताय आसा. रस्ते खणटना रस्त्याचे कुशीची गटार वेवस्थाय इबाडल्या. कांय कडेन गटारांच नाशिल्ल्यान पावसाचें उदक थंट रस्त्या वयल्यान व्हांवतालें. चोपडें जंक्शन ते कुर्बानवाडो मोरजी पंचायत वाठारांतल्या विद्याप्रसारक हायस्कूल जंक्शन मदलोवाडो, बागवाडो, मरडीवाडो, न्यू वाडो, मोरजी आश्वें मांद्रें, जुनसवाडो ह्या वाठारांनी पयल्याच पावसाचें उदक सांचून उरलें आनी ताका लागून वाहन चालकांक कसरत करची पडली. त्या त्या पंचायत मंडळांनी गटार वेवस्था आनी म़न्सूनपूर्व कामां पुराय करूंक नाशिल्ल्यान ही स्थिती निर्माण जाल्ल्याचें लोकांचें म्हणणें आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
