भांगरभूंय | प्रतिनिधी
खबरां संस्था
लंडनः डब्ल्यूटीच्या निमाण्या दिसा स्कॉट बोलँडान एकेच ओव्हरीत विराट कोहली आनी रवींद जडेजाक आवट केलें आनी ऑस्टॅलियेक व्हडलें जैत मेळोवन दिलें. ऑस्ट्रेलियेच्या बॉलरां सामकार भारताचो दुसरो डाव 63.3 ओव्हरींत 234 धांवड्यांचेर सोपलो आनी तांकां 209 धांवड्यांनी लजेक घालपी हार खावची पडली. आयसीसीच्या डब्ल्यूटीसी चॅम्पिशन फायनलींतली ही सेगीत दुसरी हार आसा. 2014 उपरांत भारतीय पंगडाची आयसीसी सर्तींतले निमणे फेरयेंत जाल्ली ही चवथी हार थारली.
एकवेळार दक्षीण आफ्रिकेक किकेट संवसारांत चोकर्स म्हणटाले. ती नामुश्की सध्या भारतीय पंगडार आयल्या. ऑस्ट्रेलियेन भारताक जैता खातीर 444 धांवड्यो करपाचें आव्हान दिल्लें. ताचो फाटलाव करतना भारताच्या एकाय खेळगड्याक अर्द शेंकड्याची खेळी करपाक जमलें ना आनी तांकां हार खावची पडली. फाटले डब्ल्यूटीसी फायनलींत भारताक न्यूझिलंडा कडल्यान हाऱ खावची पडिल्ली. हे खेपे ऑस्ट्रेलियेन भारताचें जैताचें सपन खरें करपाक दिले ना आनी 209 धांवड्यांनी व्हडलें जैत मेळयलें.
ऑस्ट्रेलियेच्या 444 धांवड्यांचो फाटलाव करतना भारताच्या बॅट्समनानी जैताचे जीव तोडून यत्न केले. मात कॅप्टन रोहित शर्मा, शुभमन गील, विराट कोहली आनी अजिंक्य रहाणे सारक्या फॉर्मांत आशिल्ल्या बॅट्समनांक बाद करपाक ऑस्ट्रेलियेच्या बॉलरांक येश मेळ्ळें.
भारता खातीर रोहित शर्मान 43, शुभमग गिलान 18, चेतेश्वर पुजारीन 27, विराट कोहलीन 49, अजिंक्य रहाणेन 46, श्रीकर भरतान 23, महम्मद शमीन 13 धांवड्यो केलो. रवींद्र जडेजा आनी शार्दुल ठाकूर शून्याचेर बाद जाले. स्कॉट बोलँडान 3 विकेटी आनी मिचेल स्टार्कनान 2 विकेटी घेतल्यो. नेथन लायनात 4 विकेटी घेतल्यो. कॅप्टन पॅट कमिन्साक एक विकेट मेळ्ळी.
विराटान सचिनाचो विक्रम मोडलो
विराट कोहलीचें वर्ल्ड टॅस्ट चॅम्पिशनशिपीच्या मॅचींत अर्द शेंकडो एके धांवडेक लागून जावपाक शकलें ना तरी तो आयसीसीच्या नॉकआवट मॅचींत भारता खातीर सगल्यांत चड धांवड्यो करपी बॅट्समन थारला. कोहली पयलीं सचीन तेंडुलकार भारता वतीन आयसीसीच्या नॉकआवट मॅचींत सगल्यांत चड धांवड्यो करपाच्या पयल्या नंबराचेर आशिल्लो आतां तो दुसऱे सुवातेर पावला.
विराटान आतां मेरेन आयसीसीच्या नॉकआवट मॅचींत भारता खातीर 683 धांवड्यो केल्यात. सचीन तेंडुलकारान 657 धांवड्यो केल्यात. ऑस्ट्रेलियेचो रिकीं पाँटिंग 731 धांवड्यो करून पयले सुवातेर आसा. विराट दुसरे आनी सचीन तिसरे सुवातेर आसा. रोहित शर्मा चवथे सुवातेर आसा.
आयसीसीच्या नॉकआवट मॅचींत सगल्यांत चड धांवड्यो करपी बॅट्समन (सरासरी)- रिकी पाँटिंग- 731 धांवड्यो (45.68), विराट कोहली- 683 धांवड्यो (52.15), सचीन तेंडुलकार- 657 धांवड्यो (50.53), रोहित शर्मा- 620 धांवड्यो (44.28), कुमार संगकारा- 595 धांवड्यो (39.66)
हारीचें खापर बीसीसीआयचेर
भारतीय पंगडाक डब्ल्यूटीसीचे फायनलींत हार खावची पडली हाचें खापर कॅप्टन रोहित शर्मान बीसीसीआयचेर फोंडलां. हे फायनलींत आमकां हार खावची पडली, मात एक गजाल मतींत दवोरपाक जाय आनी ती म्हणल्यार ही फायनल आशिल्ली. एकाद्री माळ जिखप आनी फायनल जिखप हातूंत व्हडलो फरक आसता. आमी फाटीं इंग्लंडाक खेळपाक आयिल्ले तेन्ना तयारी करपा खातीर 25-30 दीस दिल्ले. ताका लागून इंग्लंडा आडचे माळेंत आमी बरी कामगिरी केल्ली. तीच गजाल हे फावट करपाक जाय आशिल्ली. फायनलीचे मॅची खातीर आमकां बीसीसीआयन जाय तितलो वेळ दिलो ना असें रोहितान सांगलें.
ऑस्ट्रेलियेक 13.2 कोटी
वर्ल्ड टॅस्ट चॅम्पियन ऑस्ट्रेलियेक इनाम म्हणून सुमार 13.2 कोटी रुपया इनाम म्हणून मेळ्ळ्यात. फायनलींत हार खावपी भारताक 6.5 कोटी रुपये मेळ्ळ्यात. डब्ल्यूटीसी सर्तींतल्या टॉप 9 पंगडांकलेगीत बरी रक्कम मेळ्ळ्या. आयसीसीन वर्ल्ड टॅस्ट चॅम्पियन पंगडा खातीर 1.6 मिलियन डॉलरांची इनामां दवोरल्लीं. गुण क्रमवारींत तिसरे सुवातेर आशिल्ल्या दक्षीण आफ्रिकेच्या पंगडाक 3.6-72 कोटी रुपये आनी चवथे सुवातेर आशिल्ल्या इंग्लंडाक 2. 89 कोटी आनी पांचवे सुवातेर आशिल्ल्या श्रीलंकेक 1.65 कोटी रुपये मेळ्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
