भांगरभूंय | प्रतिनिधी
खबरां संस्था
काकामिगहाराः भारताच्या बायल पंगडान चार फावट चॅम्पियन आशिल्ल्या दक्षीण कोरियाक हारोवन इतिहास रचलो. आयतारा जाल्ले फायनलींत भारतीय पंगडान कोरियाक 2-1 अश्या गोलांनी हारोवन पयलेच फावट आशिया कप सर्तीचें वस्तादपण मेळयलें.
हाचे पयलीं सेमी फायनलींत जैत मेळोवन भारतीय पंगड ज्युनिअर वर्ल्ड कपा खातीर पात्र थारल्लो. ज्युनियर वर्ल्ड कप सर्त अंदू 29 नोव्हेंबर तें 10 डिसेंबर मजगतीं चिलींत जातली.
जपानच्या काकामिगहारा शारांत जाल्ले आशिया कप सर्तीचे फायनलींत भारत आनी दक्षीण कोरियान पयल्या हाफांत एक-एक गोल केल्लो. भारता खातीर पयल्या हाफांतल्या 22 व्या मिनटाक अन्नून पयलो गोल केलो जाल्यार दुसऱ्या हाफांत 41व्या मिनटाक नीलमान गोल करून भारताक जैत मेळोवन दिलें. कोरियाचो गोल पार्क सेयोनान केलो.
लीग फेरयेंत भारत अव्वल
भारतीय पंगडात लीग फेरयेंत गुण क्रमवारींत पयलो नंबर मेळयल्लो. लीग फेरयेंत चार मॅचींतल्यो तीन मॅची भारतान जिखल्ल्यो जाल्यार एक मॅच ड्रॉ जाली. भारतान लीग फेरयेंतले आपले पयले मॅचींत उज्बेकिस्तानाक 22-0 अशें हारयल्लें. दुसरे मॅचींत तांणी मलेशियाक 2-1 हारयल्लें. कोरिया वांगडची तिसरी मॅच ड्रॉ जाली. भारतान आपली लीग फेरयेंतली निमणे मॅचींत चीनी ताइपेक 11-0 अशें हारयल्लें.
हे आशिया कप सर्तींत 10 पंगडांनी वांटो घेतिल्लो. भारतीय पंगडा वांगडा हेर चार पंगडांक वर्ल्ड रेकिंगाच्या आदारान अंडर -21 हॉकी सर्तींत थेट प्रवेश मेळ्ळा. चीन, दक्षीण कोरिया, जपान आनी मलेशिया अशे हे पंगड आसात. पोरूं ऑक्टोबर म्हयन्यांत कजाकिस्तानांत जाल्ले बायलांचे ज्युनियर कप सर्ती वरवीं कजाकिस्तान, हाँगकाँग, चीनी तायपे, उज्बेकिस्तान आनी इंडोनेशियाचे पंगड हे सर्तीं खातीर पात्र थारिल्ले.
लीग गुण क्रमवारी
(मॅची, जिखले, हारले, ड्रॉ आनी गुण)
भारत- 4, 3, 0, 1, 10
द. कोरिया- 4, 3, 0, 1, 10
मलेशिया- 4, 2, 2, 0, 6
चीनी तायपे- 4, 1, 3, 0, 3
उज्बेकिस्तान- 4, 0, 4, 0, 0
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
