भांगरभूंय | प्रतिनिधी
माफ करात, ‘छत्री न खोल…’ हें गीत सिनेमांतच सोबता, पावसाच्या दिसांनी रेनकोट, सत्री जायच. सत्री, रेनकोट घरा भायर सरतना जाणट्यां- नेणट्यांनी बराबर घेवची. दर वर्सा नवी सत्री, रेनकोट विकतो घेवपाक जाय अशें ना, दोन वर्सां एक सत्री, जोतें, रेनकोट सांबाळचो. ते खातीर एक गजाल करात, घेता ती सत्री, रेनकोट, जोतें बरे कंपनीचे आसतलें, हाची खात्री करची. सत्री, रेनकोट हाता कडेन आसल्यार पावसांत तांच्या उपेगान उणे भिजता, भलायकीय बरी उरता.
पावस आनी भलायकेचे लागींचे संबंद. पावसा आदीं आपत्ती वेवस्थापन, पंचायत, पालिका यंत्रणे वांगडा सरकारी भलायकी यंत्रणा बळिश्ट आसा हें सरकारान, भलायकी मंत्र्यान पळोवचें. कोविडा वेळार खाजगी हॉस्पिटलां, दोतोरांक बरोबर घेवन सरकारान दोन पावसाळे काडले. हाचे फुडेंय सरकारान वैजकी शिक्षण, भलायकेच्या मळार गांवागांवांतल्या दोतोरांची समिती बांदल्यार राज्यांचें आरोग्य सुदारतलें.
भलायकी खातें मनीसबळांत फाटीं पडटा अशें आतर्या पयऱ्यान येवपी जायराती सांगतात. तीस- चाळीस वर्सां सेवा दिवपी दोतोर सेवेंतल्यान निवृत्त जाले तरी ते वैजकी शिक्षणा खातीर तांचे तांकी प्रमाण मजत करूंक शकतले काय ताचो अभ्यास ताकतिकेन करप समा जातलें. एक- दोन वरां ग्रामीण आरोग्य केंद्रांनी सेवा दिवपाची तांची तयारी आसल्यार आरोग्य मिशन तांची वाट पळयता.
आमचे साडेतीन दसकांचे पत्रकारितेंत डॉ. दीपक काबाडी, डॉ. जुजे डिसा, डॉ. राजेंद्र तांबा, डॉ. राजन कुंकळ्ळकार, डॉ. नागेश दुभाषी, डॉ. राजनंदा देसाय, डॉ. जगदीश काकोडकार, डॉ. शिवानंद बांदेकार, डॉ. विनय जिंदाल, डॉ. विश्वनाथ धुमे, डॉ. गणेश भाटकुळी, डॉ. राजेंद्र हेगडे, डॉ. मंगला तांबा, डॉ. प्रदीप नायक, डॉ. उगम उसगांवकार, डॉ. शेखर साळकार, डॉ. शमीन कुडचडकार, डॉ. अजय वैद्य, डॉ. प्रितम नायक, डॉ. माधव वागळे, डॉ. व्यंकटेश हेगडे, डॉ. ऑस्कर रिबेलो, डॉ. रुफीन मोंतेरो, डॉ. एडविन गोम्स, डॉ. उल्हास कैसरे तशेंच हेर दोतोरां कडल्यान मेळिल्ले माहितींतल्यान भलायके विशीं जागृताय जाली. सनसनाटी खबरो सांगपी, भलायकी खात्यांतले दोश दाखोवपी कर्मचारी, नसाय करपी दोतोर आमकांय मेळ्ळे.
खात्यांनी खबरो मेळोवपाक गेल्ल्या वेळार आपसूक कर्मचाऱ्यांची वळख जाता, मुखेल खबरोय तांचे कडल्यान मेळपाक शकतात. खबरांकारांनी दोतोरांची मान्यताय घेवनूच खबर दितल्यांचीं नांवां दिवप योग्य. खबरो दिवपी स्रोत (सोर्स) खात्रीचो आसपाक जाय, आपसुवार्था पासत खबरेकाराचो, दिसाळ्यांचो, व्हिज्युवल मिडियाचो तो गैरफायदो घेवचो ना हाचे कडेन खबरेकारांचें लक्ष आसचें. डॉ. तांबा हांचे वरी साथीच्या दुयेंसाचें खासा शिक्षण घेतिल्ले आदीं एकादरे आशिल्ले. डॉ. तांबा, डॉ. काबाडी, डॉ. राजनंदा हांचो राज्यांत मलेरिया, एच आय व्ही, कामिणी वरी दुयेंसां आळाबंदा हाडपांत व्हड वांटो आसा. राज्यांतले आरोग्य यंत्रणेचो पांवडो तसो बरो आसलो, गांवागांवां मेरेन आरोग्य केंद्रां, हाॅस्पिटलां पावलीं तरी दोतोरांची संख्या कमीच. दोतोरांचें बळगें वाडोवपा पासत मुखेल हाॅस्पिटलां, सुविधा घटमूट करपाची जापसालदारकी आरोग्यमंत्र्यांनी घेवची पडटली.
गोंयचे भलायकीमंत्री म्हणून यादींत उरपा सारको वावर आदले मुख्यमंत्री डॉ. विल्फ्रेड डिसोझा हांचो. तांचीं वेगळीं यादस्तिकां कित्याक जाय? पत्रकारांनी चड प्रस्न विचारिल्ले तांकां, तांचे शिश्य, पयलींचे खासदार लुईझिन फालेरो हांकांय मानवनासलें. डॉ. विली आनी गोंय राज्याचे चड काळ मुख्यमंत्री जावपाचो मान मेळोवपी प्रतापसिंह राणे, आदले उपमुख्यमंत्री दयानंद नार्वेकार, रमाकांत खलप, आदले मुख्यमंत्री मनोहर पर्रीकार, आदले उपमुख्यमंत्री फ्रान्सिस डिसोझा, हांचें नातें कशें आशिल्लें त्यो काणयो विखुरिल्ल्या पत्रपानांनी वाचप्यां मुखार येतल्योच. कोणें कोणाच्या फाटींत सुरो तोपलो? कोणें विधानसभेंत कदेलांचो खेळ केलो? तें वाचप्यांक खबर नासतलें अशें न्ही, पूण आनिकूय फाटल्यान ल्हान इतिहासाचीं पानां आसात. दोतोर विली हांच्या साळगांवाच्या घरा बदकां आशिल्लीं. कितल्या पत्रकारांनी तीं पळयल्लीं?
लोकसभा वेंचणूक लागीं आयली की दोतोर विली हांची याद येता, तांणीय लोकसभा वेंचणूक लढयल्ली. ते लोकसभेंत पावले नात, पूण शिश्य फालेरो हांणी लोकसभा पळयली. दोतोर विली हांणी आरोग्य, पर्यटन, भौशीक बांदकाम ह्या दोन तीन खात्यांत बारीकसाणेन वावर केला. अर्थ, घर (गृह) मंत्रीपदां पासत तें सदांच लटाफटी करपी, थेट सोनियाजींक (काँग्रेस फुडारी सोनिया गांधी) कडेन तांच्यो कागाळी. कोणा आड? विखुरिल्ल्या पत्रपानांनी फुडारांत वाचुया. आरोग्यमंत्री म्हणून दोतोर विली हांकां सरकारान सलाम केला, पूण गोंय वैजकी म्हाविद्यालय आनी हॉस्पिटलाचें आरोग्य कशें आसा? व्हिजिटिंग समित्यो हॉस्पिटला खातीर आसात? पत्रकारांक जाय जाल्यार पावसाच्या दिसांनी खबरो खूब आसात, दिसाळ्यांनी स्पेस (मळब न्ही, जागो वा सुवात) खंय? दिसाळ्यांच्या वेपार, वेवसायीकरणांत आरोग्याच्यो पुरवण्यो पावसाच्या दिसांनी आसतल्योच. आरोग्यमंत्र्यांक एक राज्यमंत्री दिवपाचो विचार मुख्यमंत्री करतले? आरोग्य शिक्षण आतां सांखळे मुख्यमंत्र्यांच्या मतदारसंघा मेरेन पावलां, उदरगतींतलें एक व्हड
पावल, ल्हान आसलें तरी तितलेंच तें म्हानय आसा.
पावसांत पत्रकारांनी आरोग्यम् धन संपदा म्हणपाक शिकोवचेंच पडटा, सोद पत्रकारितेंतल्यान.
सुहासिनी प्रभुगांवकार
9881099260
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
