भांगरभूंय | प्रतिनिधी
भारताच्या हॉकी पंगडान बायलांचे ज्युनियर आशिया करंड सर्तीचे फायनलींत सुवात मेळयली. काल जाल्ले सेमी फायनलींत ताणें येजमान जपान पंगडाक 1-0 अशा फरकान हारयलो. मॅचींतलो एकोडो आनी म्हत्वाचो गोल सुनीता टोपोन 47व्या मिनटाक केलो.
ह्या जैता सयत भारत संवसारीक ज्युनियर हॉक सर्तीची पात्रताय मेळयली. संवसारीक ज्युनियर सर्त अंदूं 29 नोव्हेंबर ते 10 डिसेंबर मेरेन चिली देशांत चलतली.
लीग पांवड्यार लेगीत भारत गुणतकट्यांत पयले सुवातेर आशिल्लो. चारांतल्यो तीन मॅची जिखिल्ल्यो, जाल्यार एक मॅच बादाबाद उरिल्ली. सर्तींतले पयले मॅचींत उझ्बेकिस्तानाक 22-0 फरकान हारयिल्लो. जाल्यार दुसरे मॅचींत मलेशिया आड 2-1 फरकान जैत जोडिल्लें. कोरिया आडची मॅच बादाबाद उरिल्ली निमाणे लीग मॅचींत चीनी तायपेक 11-0 फरकान हारयिल्लो.
11 जून मेरेन चलपी हे सर्तींत 10 पंगडांनी वांटो घेतिल्लो. भारता सयत हेर चार पंगडांक तांचे संवसारीक रॅंकिंगेच्या आदाराचेर सर्तीची पात्रताय मेळयिल्ली. हातूंत चीन, कोरिया, जपान आनी मलेशिया ह्या पंगडांचो आस्पाव आसा.
कझाकिस्तान, हॉंगकॉंग, चीनी तायपे, उझ्बेकिस्तान आनी इंडोनेशिया ह्या पंगडांनी पोरूं ऑक्टोबरांत कझाकिस्तानांत जाल्ले बायलांचे ज्युनियर करंड सर्ती वरवीं हे सर्तीची पात्रताय मेळयिल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
