भांगरभूंय | प्रतिनिधी
भारताचो लांब उडी खेळगडो मुरली श्रीशंकरान पॅरीस डायमंड लिगेंत इतिहासीक प्रदर्शन केलें. ताणें 8.09 मिटर लांब उडी मारून लिगेंतली तिसरी सुवात मेळयली. राष्ट्रकूल खेळां सर्तांत रुप्या पदक जिखपी श्रीशंकरान तिसऱ्या यत्नांत दिसांतली आपली सर्वोत्तम उडी मारली. डायमंड लीग सर्तींत टॉप तिनांत सुवात मेळोवपी श्रीशंकर हो भारताचो तिसरो अॅथलीट थारलो. ताचे पयलीं टोकियो ऑलिम्पिकांत भांगरा पदक जिखपी भालो फेक खेळगडो नीरज चोपडा आनी डिस्कस थ्रो खेळगडो विकास गौडा हांकां अशें प्रदर्शन करपाक येस आयिल्लें.
मजगतीं, पॅरीस डायमंड लिगेंत लांब उडींतली पयली सुवात ग्रीसाच्या एम टॅंटोग्लून (8.13 मिटर) मेळयली. जाल्यार संवसारीक वस्तादपण सर्तींत कांश्या पदक जिखपी स्वित्झर्लेण्डाच्या सायमन एहमर (8.11 मिटर) हाका दुसरी सुवात फावो जाली. मुरली श्रीशंकर तिसरे फेरये उपरांत पयले सुवातेर पाविल्लो. पूण, उपरांत तो तिसरे सुवातेर घसरलो. सर्ती वेळार विरुद्ध दिकेतल्यान व्हांवपी नेटाच्या वाऱ्याक लागून श्रीशंकराच्या प्रदर्शनाचेर परिणाम जालो.
श्रीशंकरान दुसरे खेपे डायमंड लिगेंत वांटो घेतलो. हाचे पयलीं पोरू मोनेकोंत जाल्ले लिगेंत ताका सवे सुवातेर समाधान मानचें पडिल्लें. पॅरीस डायमंड लिगेंत केल्ल्या बऱ्या प्रदर्शनाक लागून श्रीशंकरान सप्टेंबर म्हयन्यांत अमेरिकेंत जावपी डायमंड लिग फायनली खातीर गरजेचे स पात्रताय गूण मेळयले. तशेंच ऑगस्टांत हंगेरीच्या बुडापेस्टांत जावपी संवसारीक वस्तादपण सर्ती खातीर पात्र जावपाक म्हत्वाचे गूण लेगीत ताणें मेळयले.
24 वर्सां पिरायेच्या श्रीशंकराची कारकिर्दींतली सर्वोत्कृश्ट उडी 8.36 मिटर आसा. ताका ती हुपपाक जमली ना. पॅरीस डायमंड लिगेंत भारताचें प्रतिनिधित्व करपी श्रीशंकर एकोडो खेळगडो आशिल्लो. भालो फेक नीरज चोपडान दुखापतीक लागून लिगेंतल्यान नांव फाटीं घेतिल्लें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
