भांगरभूंय | प्रतिनिधी
भारताक संवसारीक टॅस्ट वस्तादपणाची फायनल जिखपाक 90 ओव्हरींनी 280 धांवड्यांची गरज आसा. चवथ्या दिसाचो खेळ सोंपलो त्या वेळार भारतान आपल्या दुसऱ्या डावांत 3 विकेटी वगडावन 164 धांवड्यो केल्यात. विराट कोहली 44 आनी अजिंक्य रहाणे 20 धांवड्यांचेर खेळटा.
ते आदीं ऑस्ट्रेलिया पंगडान आपलो दुसरो डाव 8 बाद 270 धांवड्यो करून डाव घोशीत करून भारताक जैता खातीर 444 धांवड्यांची मोख दिली.
444 धांवड्यांचो फाटलाव करपाक मैदानांत देंविल्ल्या भारताक मुखेली विराट कोहली आनी शुभमन गिल हांणी बरी सुरवात करून दिली. दोगांयनी आत्मविस्वासान डावाक सुरवात केली. पूण, कॅमरून ग्रिनाच्या वादग्रस्त कॅची उपरांत गिलाक तंबूंत परतून वच्चें पडलें. गिलान पयले विकेटी खातीर रोहिता वांगडा 41 धांवड्यांची भागिदारी केली.
रोहितान उपरांत चेतेश्वर पुजारा वांगडा मेळून वेगान धांवड्यो करपाक सुरवात केली. दोगांयनी दुसरे विकेटी खातीर 77 बॉलांनी 51 धांवड्यांची भागिदारी केली. ही भागिदारी नॅथन लियोनान फोडली. ताणें रोहिताक एलबीडब्ल्यू बाद केलो. ते उपरांत पुजारा लेगीत रोखडोच तंबूंत परतलो. पॅट कमिन्साच्या शॉर्ट पिच बॉलाचेर पुजारा अपरकट करपाक सोदतालो. पूण, बॉल बॅटाचे सकयले वटेन लागून विकेटकीपर एलेक्स कॅरीच्या ग्लोव्सांत गेलो. रोहित आनी पुजारा दोगूय 93च्या स्कोराचेर बाद जाले. रोहित आनी पुजारा बाद जाल्या उपरांत बॅटिंगेक आयिल्ल्या कोहली आनी रहाणे हांणी 23वे ओव्हरींत भारताचो 100 वयर पावयलो.
मजगतीं, दुसऱ्या डावांत एलेक्स कॅरीन नाबाद 66 धांवड्यांची खेळी केली. जाल्यार मार्नस लाबशेनान 41 धांवड्यांचें योगदान दिलें. भारता वतीन दुसऱ्या डावांत रवींद्र जडेजान सगल्यांत चड 3 विकेटी घेतल्यो. मोहम्मद शमी आनी उमेश यादव हांकां दरेकी 2 विकेटी फावो जाल्यो. मोहम्मद सिराजान एक विकेट घेतली.
ते पयलीं ऑस्ट्रेलियेन चवथ्या दिसाच्या जेवणाच्या विसवा मेरेन 6 विकेटी वगडावन 201 धांवड्यो केल्ल्यो. ऑस्ट्रेलियेक सकाळच्या सत्रांत 26 ओव्हरींनी 78 धांवड्यो करतना संघर्श करचो पडलो. पयल्या सत्रांत कॅरीन 61 बॉलांनी 41 आनी मिचेल स्टार्कान 11 धांवड्यो केल्यो. खूब गर्मी आशिल्ल्यान खेळपट्टी फास्ट बॉलरांक आनी स्पिनरांक मजत मेळटाली.
ऑस्ट्रेलियेन सकाळीं 4 बाद 123 धांवड्यां वयल्यान मुखार खेळपाक सुरवात केली. मार्नस लाबशेन तिसरे ओव्हरींत बाद जालो. ताणें 126 बॉलांनी 41 धांवड्यो केल्यो. ताका पयरच्या स्कोरांत एकूय धांवडेची भर घालपाक जमली ना. ताका उमेश यादवान बाद केलो. 44 ओव्हरीं पोरणो जाल्ल्या बॉलान रिव्हर्स स्विंग करपाचो उमेश आनी मोहम्मद शमी हांणी यत्न केलो. रवींद्र जडेजान 23 ओव्हरींनी 58 धांवड्यो दिवन 3 विकेटी घेतल्यो.
मजगतीं, भारताचो पयलो डाव 296चेर सोंपिल्लो. जाल्यार ऑस्ट्रेलियेन पयल्या डावांत 469 धांवड्यो केल्ल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
