भांगरभूंय | प्रतिनिधी
रान खात्या कडेन धाकू मडकयकार हांचे आड कागाळ
भांगरभूंय । प्रतिनिधी
वाळपयः जमनीचो वाद मुंबय उच्च न्यायालयाच्या गोंय खंडपिठांत प्रलंबीत आसतना भुंयपाल होंडाच्या सर्व्हे नं. 16/1 जमनीर खैरीच्या झाडांची व्हड प्रमाणांत कत्तल केल्या, अशी कागाळ शंकर लक्ष्मण गांवकार हांणी वाळपय रान खात्याच्या परिक्षेत्र अधिकाऱ्यां कडेन केल्या. हे संबंदांत खोलायेन चवकशी करून संबंदितांचेर कायदेशीर कारवाय करची, अशी तांणी मागणी केल्या.
ही कागाळ माशेल कुमारजुवेंच्या धाकू मडकयकार हाचे आड केल्या. मेळिल्ले म्हायती प्रमाण भुंयपाक होडा वाठारांत ‘कुटुंबाचे गावस’ ह्या सर्व्हे नं. 16/1 जमनीचो वाद सध्या मुंबय उच्च न्यायालयाच्या गोंय खंडपिठांत प्रलंबीत आसा. ह्या खटल्याची रोखडीच अंतीम सुनावणी जावपाची आसा. कागाळ करप्यान दाखल केल्ले कागाळी प्रमाण फाटल्या 30 वर्सां सावन हे जमनीची मालकी लक्ष्मण गांवकार हांचे कडेन आसा. हे संबंदांतलो वाद सत्तरी म्हालाच्या संयुक्त मामलेदाराच्या न्यायालयांत प्रलंबीत आशिल्लो. ताचेर निवाडो दिवन संयुक्त मामलेदारान हे जमनीचो ताबो सध्या तरी लक्ष्मण गांवकार हांचे कडेन आशिल्ल्याचें स्पश्ट केल्लें. उपरांत हो वाद मुंबय उच्च न्यायालयाच्या गोंय खंडपिठांत दाखल जाल्लो. हो वाद खंडपिठांत प्रलंबीत आसा. अशें आसून लेगीत कुमारजुवेंच्या धाकू मडकयकार हांणी ते जमनी वयल्या खैर आनी हेर झाडां व्हड प्रमाणांत मारल्यांत. ते खातीर गरजेचो आशिल्लो परवानो घेवंक ना. ताका लागून ही कृती बेकायदो आशिल्ल्यान ताचे आड शंकर गांवकार हांणी कागाळ दाखल केल्या. हे कागाळेक 1/14 चो उतारो जोडला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
