भांगरभूंय | प्रतिनिधी
म्हापशें: शुक्रारा आनी शेनवारा पडिल्ल्या मॉन्सूनपूर्व पावसाक लागून बार्देस म्हालांतल्या कांय वाठरांनी झाडां पडलीं. वीज पुरवण बंद जावपा सयत रस्त्याचेर उदक सांचपाचे प्रकार घडले.
कळंगूटे पोरबवाड्यार लक्ष्मी साळगांवकार हांच्या घराचेर माड आनी आंबाड्याचें झाड पडलें. तातूंत शौचालय, फ्रीज, नळें आनी हेर साहित्याची मोडतोड जाल्ल्यान सुमार 2 लाखांचें लुकसाण जालें.
शापोरा एका घराचेर माड पडिल्ल्यान 10 हजारांचें लुकसाण जालें. हणजूण्यां रस्त्यांचेर आनी विजेच्या सरयांचेर झाडां पडलीं. तशेंच रेवोड्यां रस्त्याचेर आनी वीज सरयांचेर झाड पडलें.
साळगांवां एका घराचे गेटीचेर आनी रस्त्याचेर झाड पडलें. पर्वरे भुरग्यांचे बागेच्या पार्किंगेचे सुवातेंत झाड पडलें, हीं सगळीं झाडां म्हापशें, पिळर्ण आनी पर्वरी उजो पालोवपी दळाच्या जवानांनी कांपून कुशीक काडलीं.
शुक्रारा राती पडिल्ल्या पावसाक लागून कळंगूटेचो वीज फिडर निकामी जालो. ताका लागून गांवांतल्या खूबशा वाठारांनी वीज पुरवण खंडीत जाली. वीज कर्मचाऱ्यांनी शेनवारा दनपार मेरेन तो फिडर दुरुस्त करून वीज पुरवण सुरळीत केली.
इसकय आनी बस्तोडें पंचायत वाठाराक नागवें वीज उपकेंद्रा वरवीं वीज कनेक्शन दीत सावन ह्या गांवांनी वोडशेडींगची समस्या उप्रासल्या. शुक्रारा रातीं पावस पडले उपरांत वीज पुरवण खंडीत जाली, ती फांतोडेर परतून सुरू जाली. तशेंच शेनवारा सकाळीं परतून वीज पुरवण बंद जाली. म्हापशें शारा सयत म्हालांतल्या हेर वाठारांनीय पावसाक लागून वीज पुरवण खंडीत जावपाचे प्रकार घडले. म्हापशेंची गटारां पालिकेन कंत्राटदारा वतीन नितळ केल्ली. तातूंतलो चिखल धडेरूच दवरिल्ल्यान तो परतून व्हांवून गटारांत गेलो. शेनवारा पावस पडले उपरांत तो चिखल काडपाचें काम कंत्राटदारान हातांत घेतलें. मरड म्हापशें, तार बस्तोडें, साळगांव, गिरी, पर्वरी ह्या वाठरांनी पावसाचें उदक रस्त्याचेर सांचिल्ल्यान येरादारीक आडखळ जाली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
