भांगरभूंय | प्रतिनिधी
प्रवीण आर्लेकारः खेळां अधिकाऱ्यां सयत केली मैदानाची पळोवणी
भांगरभूंय । प्रतिनिधी
पेडणें: वारखंडच्या खेळां मैदानाचें रोखडेंच इनडोर स्टेडियम करून थंय व्यायामशाळेची वेवस्था करतले. तशेंच हें मैदाना अत्याधुनीक करतले, अशी म्हायती आमदार प्रवीण आर्लेकार हांणी दिली.
शुक्रारा मैदानाची पळोवणी केले उपरांत आमदार आर्लेकार उलयताले. ह्या वेळार तांचे वांगडा खेळां खात्याचे तशेंच खेळां प्राधिकारणाचे अधिकारी महेश नायक, म्हाखाजनची सरपंच गौरी जोसलकार आनी हेर मानेस्त हाजीर आशिल्ले.
खेळगडे आनी थळाव्या लोकांचे मागणे प्रमाण ह्या मैदानाचें इनडोर स्टेडियमांत रुपांतर करतले, अशें आर्लेकार हांणी स्पश्ट केलें. पत्रकारांनी तांकां विचारलें, गोंयांत राष्ट्रीय खेळां सर्ती जातल्यो, मात मालपेंचे खेळां इनडोर स्टेडियम जीएमआर कंपनीक भाड्याक दिलां. तें तुमी परतून घेतले, असो प्रस्न विचारलो. ह्या मतदारसंघाच्या आदल्या आमदारान आपल्या कार्यकाळांत तें इनडोर स्टेडियम भाड्याक दिलां, ताका लागून सध्या तें आमचें कडेन ना. पूण आपूण मुख्यमंत्री तशेंच खेळां मंत्र्यां कडेन चर्चा करून तें मैदान रोखड्या रोखडें पेडणेंच्या खेळगड्यां खातीर उपलब्ध करून दिवपाचो यत्न करतलों, अशें आर्लेकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
