भांगरभूंय | प्रतिनिधी
ल्हानपणाचो म्हजो अणभव आनी आतांची पिळगी जगता ती जीण पळयत जाल्यार म्हाका तातूंत भरपूर अंतर जाणवता. कशें काय? हाचो विचार करतात न्हय तुमी. घडये हाची जाणीव थोड्यांक आसत आनी थोडीं विसरल्यांत लेगीत आसूं येता. म्हज्या भुरगेपणाची याद मुखार दवरतना म्हाका हांवें म्हज्या इश्टा वांगडा घालयल्ले भांगराळे दीस याद जातात. शाळेंतल्यान घरा परतले उपरांत टिव्हीचेर कार्टून पळोवप, तातूंत मागीर टाॅम अँड जेरी, डोरेमोन, छोटा भीम सारख्या आनीक साबार मनोरंजन करपी कार्टूनाचो आसपाव आसा. पूण, आयज भुरग्यां खातीर मोबायल गेम्स मनोरंजनाचें नवीन साधन जावन पडलां.
कार्टून पळोवप बरें काय वायट हाची जाणीव तुमकां म्हजे परस चड आसतली. म्हजो आयचो विशय कार्टून ना देखून तातूंत आनीक भर घालीनासतना मूळ विशया कडेन वळटां. म्हाका ल्हान आसतना क्राफ्ट पेपराच्या आधारान असंख्य कलाकृती करपाची आवड आसली. आनी ताचें मूळ कारण पोगो चॅनेलाचेर मैड (M A D) नावाची कार्यावळ. म्हणल्यार, म्युझिक, आर्ट, डॅन्स. तुमी सगळ्यानी पोगो चॅनेलाचेर ती पळयल्याच आसतली आनी जरी कोणे पळोवंक ना जाल्यार तुमी तुमच्या भुरग्यापणाचो भांगराळी संद वगडायतले, अशें हांव म्हणीन. शाळेंत चित्रकलेचो विशय आसून लेगीत केन्ना काय शाळा सुटून घरा परतले उपरांत मैड प्रोग्राम पळयतलो हाची हिसपा भायर उमळशीक आसताली. एका मनशात इतली कुशळटाय कशी आसतली हो विचार लेगीत येतालो. पुराय दीस ताणें शिकयिल्ल्यो कलाकृती पळोवन मनाक वेगळीच खोस जाणवताली. म्हजे बालपण हांवे सुखान जियेलां अशें हांव हक्कान म्हणीन.
वाडट्या वया वांगडा आमी खुबश्यो गजाली विसरतात. हें कितलें सत्य? म्हजे सांगचे म्हणल्यार धावे उपरांत हांव कार्टून पळोवपाचे सोडले खरें पूण मैड नावाचो शो मात म्हजे तकलेंतल्यान केन्नाच सुटूंक ना. अदी मदी युट्युबाचेर ताचो एपिसोड पळयलातो आनी थोड्या वेळा उपरांत ते लेगीत बंद जालें. पूण मैड नावाच्या शोत कलाकृती करपी त्या मनशाचे खरें नांव कितें आसतले काय? आनी केन्ना तरी प्रत्यक्षात ताची भेट जातली काय, अशे साबार प्रस्न म्हज्या मना भितर तांडव करताले. ह्या तांडवाक 15 डिसेंबर 2022 दिसा विसव मेळ्ळो. गोंयांत serendipity arts festival सुरू आशिल्लें आनी ताचो अणभव घेवपाची संद कोण सोडीत? हांवे लेगीत ते नियाळपाक चड वेळ काडूंक ना. नियाळटा नियाळटा म्हजे दोळे एका मनशाक पळयत उरले, तो मनीस आनीक कोण न्हय तर त्याच पोगो चॅनेलाचेर येवपी मैड एपिसोडाचो रोब आशिल्लो. खीणाक म्हाका दोळ्यांचेर विस्वास बसूंक ना, हांव पळयतां तें सत्य काय सपन हाची वासपूस करपाक हांव मातसो मुखार सरलो. आनी पळयत जाल्यार निळ्या रंगाचे टिर्शट आनी माथ्यार कॅप घालून हरुण राॅबर्ट जाका आमी ‘रोब’ ह्या नावान वळखतात तो. हांवें वेळ घालयनासतना ताच्या सामकार धांव मारली. कितें उलोवप, कितें विचारप हें हांव त्या खिणाक विसरून गेल्लो. इतल्या बोवाळान ‘Hi Sir, thanks for making our childhood days awesome. nice meeting you, one selfie please’ इतलें म्हणून हांवें तो भांगराळो खीण म्हज्या मोबायलाच्या कॅमरात सेव केलो. शेवटाक, ‘सर तुमी गोंयांत रावतात?’ इतले विचारलें. ‘हय, दक्षीण गोंयांत’ ही तांची जाप आयकना फुडें हांव फुलपाख्या वरी मळबांत पावलो. कितें उलोवप हाचो विचार करचे पेक्षा ‘बेगीनूच परत मेळूया’ म्हणीत हांव थंयच्यान भायर सरलों. घरा पावतकच इन्स्टाग्रामार ताचो @artguyrob प्रोफायल फोलो केलो, आयज लेगीत हो कलाकार आपली कला मुखार व्हरता ते पळोवन मन धादोस जालें. तुमी लेगीत ताची कलाकृती ताच्या @artguyrob ह्या प्रोफायलात पळोवंक शकतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
