भांगरभूंय | प्रतिनिधी
पोलंडाची इगा स्वियातेक आनी झेक प्रजासत्ताकाची कॅरोलिना मुकोवा हांचे मदीं फ्रॅंच ओपनाच्या बायलांच्या गटांतली फायनल जातली. सध्याची वस्ताद आनी पयल्या क्रमांकाची खेळगडी स्वियातेकान सेमी फायनलींत ब्राझिलाचे बिट्रीज हद्दाद मैयाक 6-2 आनी 7-6 (7) अशा सरळ सेटांनी हारयली. ते आदीं जाल्ले पयले सेमी फायनलींत मुकोवान संवसारीक क्रमवारींत दुसरे सुवातेर आशिल्ले एरिना सबालेंकाक 7-6 (5), 6-7 (5) आनी 7-5 अशा तीन सेटांनी हारयली.
सेमी फायनलींत सुवात मेळोवन इतिहास घडोवपी मैयान स्वियातेकाक खर आव्हान दिलें. पूण, स्वियातेकाच्या अणभवा मुखार तिका तग धरपाक जमलो ना. स्वियातेकान पयलो सेट सहज जिखलो. पूण, दुसऱ्या सेटांत मैयान खर प्रतिकार केलो. तिणें सेटांत 3-1 अशी आघाडी घेतिल्ली. पूण, स्वियातेकान संघर्श करतना सेट टायब्रेकरा मेरेन व्हेलो. टायब्रेकरांत लेगीत मैया कडेन 6-5 अशी आघाडी आशिल्ली. पूण, तिचो फोरहॅण्ड शॉट नेटाक लागिल्ल्यान स्वियातेकाक मॅचींत येवपाची संद मेळ्ळी. संदीचो योग्य रितीन फायदो घेत दुसरो सेट आनी मॅच जिखली.
दुसरे वटेन मुकोवा पयले खेपे खंयचे ग्रॅण्ड स्लॅम सर्तीचे फायनलींत पावल्या. हाचे आदीं तिणें ऑस्ट्रेलियन ओपनाचे सेमी फायनली मेरेन मजल मारिल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
