भांगरभूंय | प्रतिनिधी
सर्बियाच्या नोवाक जोकोविचान फ्रॅंच ओपनाच्या दादल्यांच्या एकोड्या गटांतले फायनलींत सुवात मेळयली. संवसारीक क्रमवारींत तिसरे सुवातेर आशिल्ल्या जोकोविचान संवसारीक क्रमवारींत पयले सुवातेर आशिल्ल्या स्पेनाच्या कार्लोस अल्कारेजाक 6-3, 5-7, 6-1 आनी 6-1 अशा चार सेटांनी हारयलो. मॅच तीन वरां मेरेन चल्ली.
अल्कारेजान पयलो सेट 3-6 अशा फरकान वगडायलो. पूण, दुसऱ्या सेटांत ताणें उत्कृश्ट प्रदर्शन करून 1-1 अशी बरोबरी सादली. ताणें जोकोविचाक 7-5 फरकान हारयलो. पूण, तिसरे गेमींत अल्कारेजाच्या पांयाक क्रॅम्प आयलो. ताका लागून ताची लय इबाडली आनी उपरांत ताका मॅचींत पुनरागमन करपाक जमलें ना. दुखापतीक लागून अल्कारेजान तिसरो आनी चवथो सेट 6-1, 6-1 असो सहज वगडायलो.
मजगतीं, जोकोविच संवसारीक विक्रम करपा पसून फकत एक जैत पयस आसा. सध्या राफायल नादाल आनी जोकोविच हांचे दरेकी 22 ग्रॅण्ड स्लॅम किताब आसात. पूण, नादालाक फाटीं उडोवपन सगल्यांत चड 23 किताब जिखपाची भांगराळी संद जोकोविचा कडेन आसा. तशेंच ही सर्त जिखली जाल्यार जोकोविच परतून पयले सुवातेर पावतलो.
जोकोविचान आनीक एक विक्रम आपल्या नांवार केलो. फ्रॅंच ओपनांत ताणें 91 जैतां जोडल्यांत. अशें करपी तो संवसारांतलो फकत पांचवो खेळगडो आसा. तशेंच वट्ट ग्रॅण्ड स्लॅमाचो विचार केलो जाल्यार तो 34वे खेपे फायनलींत खेळटलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
