भांगरभूंय | प्रतिनिधी
संवसारीक टॅस्ट वस्तादपण सर्तीचे फायनलीचो तिसरो दीस सोंप मेरेन ऑस्ट्रेलियेन आपल्या दुसऱ्या डावांत 4 विकेटी वगडावन 123 धांवड्यो केल्यात. अशे तरेन ताणें भारता आड 296 धांवड्यांची आघाडी घेतल्या. तिसऱ्या दिसाचो खेळ सोंपलो त्या वेळार मार्नस लाबशेन 41 आनी कॅमरून ग्रीन सात धांवड्यांचेर खेळटालो. ओपनर उस्मान ख्वाजा 13, डॅव्हिड वॉर्नर 1, स्टिव्हन स्मिथ 34 आनी ट्रॅव्हिस हेड 18 रोखडेच बाद जाले.
ऑस्ट्रेलियेन पयल्या डावांत 469 धांवड्यो केल्ल्यो, जाल्यार भारताचो पयलो डाव 296 धांवड्यांचेर सोंपिल्लो.
भारताचो अणभवी बॅट्समन अजिंक्य रहाणे (89) आनी शार्दुल ठाकूर (51) हांच्या यत्नांक लागून भारताक पयल्या डावांत 296 धांवड्यो करपाक शक्य जालें. दोगांयनी सातवे विकेटी खातीर 109 धांवड्यांची भागिदारी केली.
दिसाची सुरवात भारता खातीर निर्शेणी हाडपी थारली. स्कॉट बोलॅण्डान दुसऱ्याच बॉलाचेर श्रीकर भरताक (5) बोल्ड केलो. स विकेटी फकत 152 धांवड्यांचेर पडिल्ल्यो. ते उपरांत शार्दुल आनी रहाणे हांणी भारताचो डाव मुखार व्हेलो.
हे मजगतीं, शार्दुलाक दोन खेपे जीवनदानां लेगीत मेळ्ळी. रहाणेन 92व्या बॉलाचेर अर्द शेंकडो पुर्ण केलो. कांय वगतान कॅमरून ग्रिनाचे बॉलिंगेचेर दोन धांवड्यो करून टॅस्टींत पांच हजार धांवड्यो लेगीत पुर्ण केल्यो. 71 धांवड्यांचेर रहाणेक एक जीवनदान लेगीत मेळ्ळें. स्लिपांत डॅव्हिड वॉर्नरान ताची कॅच सोडिल्ली. दोगांयनी मेळिल्ल्या जीवनदानांचो फायदो घेत 59वे ओव्हरींत शंबर धांवड्यांची भागिदारी करतना भारताचो स्कोर 250च्या मुखार व्हेलो.
जेवणाच्या विसवा मेरेन भारतान 6 विकेटी वगडावन 260 धांवड्यो केल्ल्यो. पूण, दुसऱ्या सत्रांत रहाणे आनी उपरांत शार्दुल बाद जाल्या उपरांत भारताचो डाव रोखडोच सोंपलो.
जेवणाच्या विसवा उपरांत रहाणे रोखडोच बाद जालो. ग्रिनान ताची उत्कृश्ट कॅच धरली. सुमार 18 म्हयन्यांनी टॅस्ट पंगडांत सुवात मेळोवपी रहाणेन 129 बॉलांनी 11 चवके आनी एक सक्याचे मजतीन 89 धांवड्यो केल्यो. तो बाद जाल्या उपरांत भारताचो संघर्श लेगीत सोंपलो.
रहाणे बाद जाल्या उपरांत उरिल्ल्यो तीन विकेटी घेवपाक ऑस्ट्रेलियेक चड वगत लागूंक ना. शार्दुलान कमिन्साक चवको मारून 108 बॉलांनी अर्द शेंकडो पुर्ण केलो. अर्द शेंकडो पुर्ण करिना फुडें रोखडोच तो ग्रिनाचो शिकार थारलो. शार्दुल 51 धांवड्यो करून तंबूंत परतलो. कमिन्सान उमेश यादवाक जाल्यार मिचेलान मोहम्मद शमीक बाद करून भारताचो डाव सोंपयलो.
कमिन्सान सगल्यांत चड तीन विकेटी घेतल्यो. मिचेल, बोलॅण्ड आनी ग्रिन हांणी दरेकी दोन विकेटी मेळयल्यो. नॅथन लियोनाक एक विकेट फावो जाली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
