भांगरभूंय | प्रतिनिधी
म्हज्या जायत्या लेखां भितर हांवें परत परत म्हणलां, पालक जावपाक कसल्याच अधिकृत शिक्षणाची गरज पडना. खरें म्हणल्यार, जेन्ना घोव- बायलां आवय, बापूय जावपाचीं आसात म्हूण दोतोर सांगता तेन्ना सावन भुरगीं जाता मेरेन बायलां दोतोरा लागीं आनी उपरांत भुरग्यां दोतोरा लागीं एक समुपदेशक आसप गरजेचो. सरकारी हॉश्पितलांत समुपदेशकांची सोय आसप गरजेची. समुपदेशका कडेन उलोवप जाले उपरांतूच आवय बापांयक मुखेल दोतोरां लागीं मेळपाक दिवपाची तजवीज जावपाक जाय.
पोटांत आसतना सावन भुरगीं कमीच आठ वर्सांचीं जाता मेरेन भुरग्याचे कुडीची आनी मेंदवाची/ बुद्दीची वाड कशी जाता हाचें समुपदेशन आवय- बापांयक जावपाक जाय आनी भुरग्यांक ते ते पिरायेचेर कशें समजून घेवचें आनी तांचे कडेन कशें वागचें हाचें तांकां गिन्यान दिवपाक जाय.
खूबश्या पालकांक भुरगें जल्माक येत सावनूच भुरग्याची वाड चड गतीन जावची अशें दिसता. ताची शारिरीक वाड आनी ताची बुद्दीक वाडूय. भुरगें तीन म्हयन्याचें जातां जातांच तें उमथें पडना ताचे खातीर ताका बरी कडेन उशें लावन ताका दवरिल्ले आवय बापूय आसतात. ताचे पांय घट जावचे पयलींच ताका “हात सोडून इबी गे हात सोडून इबी” म्हणीत ताका बळयां उबें दवरपाचो यत्न करपी कांय पालक आसतात. दिमखुऱ्यांनी चलपी आपल्या भुरग्याक वणटीच्या कोनशाक दवरून ताका कदेलां, तिपायो हांचें आडावण घालून ताका तें हुंपपाक लावपी आनी भुरग्याक अडचणींक कसो फुडो करप हें शिकोवपी आनी आपूण तशें करतां हें सांगून मिरोवपी पालक हांवें पळयल्यात.
गायचें पाडूक आनी खूबश्या जनावरांचीं पिलां जल्मतगीर पांच मिणटां भितर चलपाक लागतात म्हूण मनशांच्या भुरग्यांचें चलप, सवण्यांच्या पिलांचें उडप तशें जायना. तांकां सैमान तयार करतना कांय पांवडे घाल्यात. ते ते पिरायेचेर ते ते बदल आनी ती ती कुवत हें सैमानूच आंखून दिलां. आतां वातावरणांत बदल जाल्ल्यान कांय शारिरीक बदल पयलीं परस चड बेगीन आंगांत येवपाक लागल्यात. देखीक, भुरग्यांची उंचाय, भुरग्यांचें जुवानपण म्हणल्यार चल्यांक मिश्यो येवप आनी चलयांक मासीक पाळी येवप आदी. भुरग्यांक चडश्यो गजाली उकतेपणान दिसतात म्हूण बुद्दीक वाडूय मातशी बेगीन जाता अशें मानपाक जाता. अशें जरी आसलें तरी ते ते पिरायेचेर निंबून तें आसता हें आमी समजून घेवपाक जाय.
चडश्या पालकांक बादता ती सर्त. आपलें भुरगें ल्हानपणात सावनूच हेर भुरग्यां परस चड मुखार आसपाक जाय ना तर तांचे बरोबर तरी आसपाक जाय अशें खूब जाणांक दिसता. आपल्या भुरग्या बरोबरचें एक भुरगें उमथें पडपाक लागलें, चलपाक लागलें, उलोवपाक लागलें आनी आपलें भुरगें तें अजून करपाक लागलें ना म्हूण बळयां ताचे कडल्यान तें तें करपाक लावपाक सोदपी, ताची चडूच चिंता करपी पालक संख्येन चड आसतात.
बालवर्गांत त्या शाळेंतल्या भुरग्यांक पुराय वर्णमाळ बरोवपाक शिकयल्या, तुमी अजून तांकां पेन सुद्दां हातांत धरपाक लायनात म्हूण तक्रार करपी पालक शिक्षकां लागीं येवन झगडटात. मागीर आपलें भुरगें हे शाळेंतलें काडून ते शाळेंत घालतलें म्हणपाची धमकीय दिवपाक ते अनमननात. शाळेचे पटसंख्येचे सर्तीक लागून मागीर शिक्षकूय ह्या धमक्यांक बळी पडटात आनी भुरग्यांच्या बोटांत शक्त येवचे पयलींच तांकां वर्णमाळ बरोवपाक शिकयतात. इंग्लीश भाशेचो इतलो प्रभाव पालकांचेर आसा, ती भुरग्यांक भुरगेपणांत सावन येवपाकूच जाय, तीय बी बरोवपाक असो अट्टाहास घेवन पालक वावुरतात. भुरग्यांची बुद्दीक वाड आठ वर्सां मेरेन सगल्यांत चड जाता. तांकां भाशेचें आकलन हे पिरायेचेर बेगीन जाता. भुरग्याक कितल्योय भासो सहजपणान भुरग्यांक कळनासतना शिकोवपाक जातात. पूण बरोवपाक न्ही. भुरग्यांची आवय भास चड विकसीत जाल्ली आसल्यार तांकां हेर भाशांचें आकलन चड बेगीन जाता. हालींच्या तेंपार भुरग्यांक हिंदी, इंग्लीश उलोपाक शिकय नासतना भुरगीं त्यो भासो उलयतात. हाचें कारण म्हणल्यार टिवी वयलीं कार्टूनां. भुरग्याचे भाशेचे उच्चार, तांची भावना उक्तावपाची तरा ही टिवी वयल्या कार्टुनांतल्या तांच्या आवडट्या पात्रा प्रमाण आसता.
हीच देख आमी घेवपाक जाय. भुरग्यांक बळयां शिकोवपाक वच्चे परस तांकां गजालींचें उकतेपण (एक्स्पोजर) दिवपाक जाय. भुरग्यांक नकळटना शिकपाक दिवप हेंच आयचें शिक्षणीक धोरण सांगता. आयज पारंपारीक शिक्षण, घोकंपट्टी हें वचपाक जाय. आमी ल्हानपणांत शिकतना (शिकोवपाची चुकीची पद्दत आसून लेगीत) एफ फॉर फॉक्स आनी एन फॉर नेल आसतालें, पूण आतां भुरग्यांनी एफ फॉर फ्रेंच फ्रायज आनी एन फॉर नुडल्स अश्यो जापो दिल्यार आमी त्यो मानून घेवपाक जाय (हें भुरग्याच्या तोंडांतल्यान आयकल्लें म्हूण ही देख दिल्या).
पालक भुरग्यांच्या परिक्षेच्या गुणांचेर भर दितात. सर्तींतल्या इनामांचेर भर दितात. भुरग्यांच्या परिक्षेंतल्या गुणांचेर जोर दिवपाची प्रवृत्ती वचून भुरग्यांच्या आंगांतले गूण वाडोवपाची प्रवृत्ती वाडपाक जाय. भुरग्याक कितलें कळटा, एकद्रे विशयाचो ताचो समज कितलो आसा हाचेर भर दिवपाक जाय.
चडशे पालक आपल्यो म्हत्वाकांक्षा, ऐश्वर्याकांक्षा ज्यो आपूण पुराय करपाक शकलों ना, त्यो आपल्या भुरग्यां कडल्यान पुराय करून घेवपाचो यत्न करतात. तातूंत भुरग्याच्या आवडीचो विचार जायना. तातूंत भुरग्याच्या मनाचो विचार जायना. आपल्याच मनाचो विचार जाता.
भुरग्यां कडल्यान अपेक्षा बाळगितना, भुरग्यांच्यो आपल्या कडल्यान आशिल्ल्या अपेक्षांचो विचार करप जायना. आपूण घर चलयतां (?) म्हणटकूच आपणें सांगिल्लेंच, आपल्याक जाय तेंच आनी आपल्याक जाय तशेंच सगलें जावपाक जाय असो पालकांचो अट्टाहास आसता. ताचो विपरीत परिणाम भुरग्यांचेर जाता.
पालकांचें समुपदेशन हो शिक्षणीक वावरांतलो वांटो जावप खूब गरजेचें.
चेतन आचार्य
9422389290
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
