भांगरभूंय | प्रतिनिधी
येरादारी नेम मोडप्यांक तालांव; कोंयडे पासून तात्पुरती सुटका
भांगरभूंय । प्रतिनिधी
वाळपयः वाळपय शारांत बेशिस्त पार्किंगेक लागून येरादारी कोंयडेचो विशय कितल्याशाच वर्सां सावन सतायता. येरादारी संबंदांत खर कारवाय करची, अशी मागणी लोक करताले, पूण सदांच ते कडेन आडनदर जाताली. मात पुलीस खात्याच्या येरादारी विभागान दोन दिसां सावन बेशिस्त पार्किंगे आड दंडात्मक कारवाय सुरू केल्या. 9 जूनाकूय ती चालू आशिल्ली. ताका लागून बेशिस्त गाडयो पार्क करप्यांचेर व्हड प्रमाणांत नियंत्रण आयलां. छत्रपती शिवाजी महाराज पालिका बागे मुखा वयलो मेकळो जाला आनी येरादारीचे कोंयडे पासून इल्ली थाकाय मेळ्ळ्या.
वाळपय शारांतली येरादारीची कोंयडी सोडोवपा संबंदांत पालिकेक खूबश्यो बसका जाल्यात. त्या बसकांनी फक्त चर्चाच जाताली, अंमलबजावणी मात केन्नाच जाली ना. ना म्हणल्यार पालिकेन लाखांनी रुपया खर्च करून दिशा दाखोवपी आनी सुचोवणी तकटे लायले. मात ताका वाहन चालक पाळो दिनात. सकाळीं आनी दनपारां जावपी कोंयडेचो चड त्रास विद्यार्थ्यांक जाता. भुरग्याक शाळेंत पावोवपाक आनी दनपारां घरा हाडपाक गेल्ले पालक कोंयडेंत शिरकून उरतात. सध्या येरादारी पुलिसांनी हो प्रस्न सोडोवपा खातीर पावलां उखल्ल्यांत. दोन दिसां सावन शारांतले बेशिस्त पार्कींक करप्यांक दंडात्मक कारवायेक फुडो करचो पडटा. तेच प्रमाण हॅल्मेट घालिनासतना दुचाकी चलोवप, येरादारीचे नेम मोडप्यांकूय तालांव दिवप 9 जूनाकूय चालू आशिल्ले. छत्रपती शिवाजी महाराज बागे मुखार आशिल्ल्या रस्त्याचेर व्हड प्रमाणांत बेशिस्त पार्कींग करताले. ताका लागून ह्या रस्त्याचेर व्हड प्रमाणांत येरादारेची कोंयडी जाताली. मात दोन दिसा सावन हो रस्तो येरादारी खातीर मेकळो जाला आनी कोंयडीचो प्रस्नूय सुटला. ही कारवाय अशीच चालू उरतली अशें अधिकाऱ्यांनी स्पश्ट केलां.
हेर वाठारांनीय जातली कारवाय
वाळपय- ठाणे मार्गाचेर सिटी हॉस कॉम्प्लेक्स वाठारांत रस्त्याच्या दोनूय वटांनी बेशिस्त तरेन गाडयो पार्क करतात. तांचेरूय दंडात्मक कारवाय करची, अशी मागणी लोकांनी केल्या. हाची दखल घेवन तांचेरूय कारवाय करतले, अशें येरादारी विभागाच्या अधिकाऱ्यांनी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
