भांगरभूंय | प्रतिनिधी
जेन्ना आमी भौशिक मळार वावुरता तेन्ना लोकांचो विस्वास जोडचो आसता. आपले चारित्र्य सांबाळून निसुवार्थीपणान आनी प्रामाणिकपणान काम करचें आसता. मोठीं मोठीं पदां मिरयलीं म्हूण जायना. आनी फकत पयशे जोडले म्हूण जायना, मनीस जोडपाक जाय. आनी मनीस जोडटलो जाल्यार आपूण पयली ल्हानपणान वागपाक जाय. घरा कडले श्रीमंतीची घमेंड घेवन समाजा मदीं वावुरूंक मेळना. समाज असल्या मनशांक फुटके पायलेन लेगीत मेजपाक तयार आसनात. सदांच मुंय जावन साकर खावंक कळूंक जाय. देश तसो वेश करूंक कळूंक जाय. लोकांचे प्रस्न एसींत बसून सोडोवंक मेळनात. प्रत्यक्ष फिल्डार येवन लोकांक मेळून लोकांची गाराणीं आयकून घेवन, लोकांचें सहकार्य घेवनच जो समस्या सोडयता तो खरो लोकनेतो, तो खरो लोकप्रिय
अधिकारी.
अधिकाऱ्यांच्या मेजार लोकांच्या फायलींचो दाळ आसूंक फावना. लोकांची कामां वेळार करपाक जाय. कुस्कुटांच्या कामाक फावटी मारूंक लावंक सामान्य जनतेक तिश्टोवंक जायना. नाखटांच्या कामाक कुराड सोदपाची नासता. तुमच्या कार्यालयात जेन्ना एखादो मनीस येता तेन्ना ताका मनीसपणान वागोवपाक जाय. प्रशासन बरें चलतलें जाल्यार जनतेक भागीदार करून घेवनूच शासनाचे उपक्रम चालीय लायले तरुच ते यशस्वी जातात. लोक जागृताय महत्वाची.
ह्या वर्सा भारत G- 20 संमेलनांचें फुडारपण करता. म्हण्टकच भारतातल्या एकशे चाळीस कोटी जनतेक G- 20 समीट म्हणजे कितें हें कळपाक जाय काय नाका? ताणीं चर्चेक खंयचें विशय घेतल्यात हेंवूय सामान्य मनशा मेरेन पावपाक जाय. म्हणून जनभागिदारी, G- 20 देशभर चालू आसा. आमी सगळे जाण बऱ्या- वायट शासनाचे भागीदार आसात म्हणपाची आमकां जाणविकाय आसा व्हय? जाल्यार आमी सगळो दोश सरकाराक कित्याक दितात? सरकारान हे़ं करूंकना आनी सरकारान तें करूंकना म्हूण. शेंकड्यांनीं लोक पंचायतींनी आपापले पंच प्रतिनीधी वेंचून धाडटात. तांतलें कितलें ग्रामसभेक उपस्थिती लायतात? आतां सरकार म्हणजे कोण? लोकशाय मार्गान आमींच वेंचून दिल्ले आमचे प्रतिनिधी. आमच्यो मुळाव्यो गरजो पुराय करपाक शासनांत ते वावुरतात. तांकां अधिकारान सांगपाचो आमकां लोकशायेन हक्क दिला, ताचो आमी कितलो वापर करतात? काय भटो भटो आपल्यो वाटो.
आयज पुराय जगाचें फुडारपण करपाची तांक आशिल्लो आनी विश्वगुरू जावपाचे दिकेन वाटचाल करपी आमचो भारत देश महान आसाच. आमी भारतीय म्हूण सांगपाक आमकां अभिमान भोगता. आयज आमी ‘आझादी का अमृत महोत्सव’ मनयतात, अशा वेळार आमच्या देशाक G- 20 समिटाचें अध्यक्षपद फावो जावप ही अभिमानाची गजाल जावन आसा. माननीय प्रधानमंत्री श्री नरेंद्र मोदीजी हे G- 20 चें फुडारपण करतात.
पुराय भारतात हे संबदी विविध मळांचेर कार्यावळी चालीक लावन लोकां मदीं जनजाग्रृताय घडोवन हाडपाचें काम नेटान चालू आसा. G- 20 ची दर वर्सा एक थिम आसता. अंदूंची थिम आसा, एक धर्तरी, एक कुटूंब, एक भविश्य… आनी G- 20 चो लोगो म्हणजे हे विश्व एक कुटूंब कशे. वसुधैव कुटूंबकम.
G – 20 च्या निमतान भारताच्या शिक्षण मंत्रालयान राष्ट्रीय, राज्य, जिल्हो, तालुको पांवड्यार आनी हायस्कुलांनी विविध कार्यक्रम आयोजीत करपाक सांगल्यात. आमच्या गोंयांतय शिक्षण संचालनालयान तें संबधी एक महत्वाची बसका घेवन सगळ्या मुख्याद्यापकांक सांगलां की तुमच्या वांठारांनी जनभागिदारी कार्यावळी राबयात. ह्यो कार्यावळी १ जून ते १५ जून मेरेन घेवन ताचे फोटो व्हिडीओ पोर्टलाचेर अपलोड करपाक जाय. हांतूत NEP, FLN, निपूण भारत, digital Innovation, G- 20, ह्या विशयांचेर मार्गदर्शन, कार्यशाळा, रॅली, संमेलनां, पोस्टर, चित्रकला सर्ती घडोवन हाडून हे विशय समाजांतल्या प्रत्येक मनशा मेरेन पावोपाक जाय. समस्त लोकांक ह्या उपक्रमांनी वांटेकार करून घेवपाक
जाय.
शिकपाक प्रोत्साहन दिवपा खातीर कितें बदल हाडला तें सर्वसामान्य मनशाक पटोवन दिवपाक जाय. देखून ही जनभागिदारी G- 20 उपक्रम राबवप सामकें गरजेचें आसा. प्रत्येकान हातूंत आपलें योगदान दिवपाची गरज आसा. कारण आमी प्रत्येक जाण ह्या प्रशासनाचे भागीदार जावपाक जाय. देशांतली गरीबी, बेरोजगारी पयस करतलो जाल्यार शिक्षणांचेर भर दिवपाची गरज आसा. ते नदरेन समग्र शिक्षा अभियना अंतर्गत विविध कार्यक्रम राबोवप चालू जालां. पूण तातूंत सामान्य मनशाक आमी भागीदार करून घेवपाक जाय. जनतेक गृहीत धरून उपकारना. जर म्हाका ग्रामीण वाठारांतल्या विद्यार्थ्यांचो सर्वांगी विकास करपाचो आसा जाल्यार पयलीं पालकांक आनी ग्रामस्थांक विस्वासांत घेवचें पडटलें. तांचे मदीं रावन तांचोच जावन काम करचें पडटलें, तेन्नाच तें शक्य आसा. जनजागृताय महत्वाची आनी उपक्रमांत जनतेची भागीदारी महत्वाची. निमाण्या मनशा मेरेन शासनाच्यो सगळ्यो येवजण्यो पावोवप सामकें गरजेचें. तेन्नाच सगळ्यांची उदरगत जातली. तें काम सरकाराचें अशें म्हणून रावनसतना सुशिक्षीत लोकांनी लोकां मदीं विंगड विंगड मळांचेर जनजागृती घडोवन हाडपाक जाय. जायत व्हय आमचे कडेन?
काशिनाथ नायक
9158345844
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
