भांगरभूंय | प्रतिनिधी
भांगरभूंय । प्रतिनिधी
मडगांवः 2024ची लोकसभा वेंचणूक लडोवपा खातीर काँग्रेस वावुरप्यां कडल्यान म्हजेर चेंपण येवपाक लागलां. पक्षान तिकेट दिल्यार ही वेंचणूक हांव लडयतोलों आनी ही म्हजी निमणी वेंचणूक आसतली अशे दक्षीण गोंयचो खासदार फ्रान्सिस सार्दिन हाणे सांगलां.
खण वेवसाय बंद जाल्या उपरांत ट्रक धनयांचें व्हड अर्थीक लुकसाण जालां. केंद्र सरकाराच्या आदेशान गोंय सरकारान 15 वर्सां पुराय जाल्ली वाहनां कावलांत काडपाचो आदेश दिला. ट्रक धनयांनी अजून रिणाचे हप्ते भरूंक ना. कसलेंच काम नासतना वाहनां कावलांत काडल्यार समस्या वाडटल्यो. सरकारान मनीसपणांतल्यान ह्या ट्रक धनयांचो विचार करचो अशें सार्दिन हाणे मागलां.
सध्या कृशी उत्पन्नांत वाड करपाचेर सरकारान लक्ष दिवपाची गरज आसा. शेताच्या बांदांची दुरुस्ती करपाची गरज आसा. शेतकारांक मजत करपाक सरकारान फाटीं रावपाक जायना अशें ताणे सांगलें. खाजगी शाळांक अनुदान दिवपाक सरकारा कडेन पयशे आसात मात सरकारी प्राथमीक शाळा इमारती सारक्यो करपाक पशयें नात, अशें जावपाक शकना अशें ताणे सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
