भांगरभूंय | प्रतिनिधी
भांगरभूंय । प्रतिनिधी
मडगांवः चांदर हांगां 2020 वर्सा रेल्वे दुपदरीकरण कामाक विरोध केल्ल्याच्या गुन्यावांतल्यान सोडचें हें खातीर दुबावितांनी केल्ले याचिके वयलो युक्तिवाद पुराय जाला. मडगांवचो पयलो वर्ग न्यायदंडाधिकारी 26 जूनाक हे केशीचो निकाल दितलो.
चांदर हांगा केल्ल्या ह्या आंदोलनांत वांटेकार जाल्ल्या अभिजीत प्रभुदेसाई, कॅ. विरियातो फर्नांडीस, डायना तावारिस आनी सबिता मास्कारेन्हा सयत हेर दुबावितांनी गुन्याव निश्चीती पयलीं निर्दोश मुक्त करपा खातीर याचिका सादर केल्ली. ती भायरावपाची मागणी सरकारा वतीन केल्या. 1 नोव्हेंबर 2020च्य मध्यानरातीं आंदोलकांनी कोळसो येरादारीक विरोध करपा खातीर चांदर हांगा आंदोलन केल्लें. ह्या प्रकरणांत दक्षीण गोंय जिल्होधिकाऱ्याच्या आदेशान मायणा- कुडतरी पुलिसांनी न्यायालयांत आरोपपत्र दाखल केल्लें.
सरकारी वकिलांनी हे याचिकेक विरोध करतना दुबावितां आड प्रायमाफेसी पुरावो आशिल्ल्याचें सामकार हाडिल्लें. ताणी निर्दोश सोडपाचे मागणेचो गुन्यांव निश्चीते वेळार विचार करप शक्य आसा अशें मत मांडल्लें. जे सुवातेर आंदोलन केल्लें थंयचो रस्तो जिल्होधिकाऱ्यान रातीं 12 तें सकाळीं 5 मेरेन बंद केल्लो. ताका लागून रस्तो आडयलो व्हो गुन्यांव जावपाक शकना. 25 साक्षिदारांतले 20 जाण पुलीस कर्मचारी आसात आनी ही केश फटीचे म्हायतीचेर आदारीत आशिल्ल्यान निर्दोश सोडपाची मागणी दुबावितांनी सुनावणे पयलीं केल्ली. दोनूय वटेनचे युक्तिवाद आयकले उपरांत केशीचो निकाल 26 जूनाक जाहीर करतले अशें न्यायालयांत सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
