भांगरभूंय | प्रतिनिधी
बिट्रीज हद्दाद मैया हाणें फ्रॅंच ओपन ग्रॅण्ड स्लॅम सर्तीचे सेमी फायनलींत सुवात मेळयली. क्वॉर्टरफायनलीचे मॅचींत तिणें ट्युनिशियाचे ओन्स जब्योराक दोन वरां आनी 29 मिनटांनी 3-6, 7-6 (5) आनी 6-1 अशा तीन सेटींनी हारयली. ह्या जैता सयत मैयान इतिहास घडयलो. फ्रॅंच ओपनाचे सेमी फायनलींत सुवात मेळोवपी ती ब्राझिलाची पयली बायल खेळगडी थारली. जाल्यार वट्ट ग्रॅण्ड स्लॅम सर्तीचो विचार केलो जाल्यार ती ब्राझिलाची दुसरी बायल खेळगडी थारली.
ओपन एरांत तिचे पयलीं मारिया बुएनोन 1968त अमेरिकन ओपनाचे सेमी फायनलींत सुवात मेळयिल्ली. मैयान फ्रॅंच ओपना आदीं ग्रॅण्ड स्लॅम सर्तींत दुसरे फेरयेचे मुखार वचूंक नाशिल्ली. तशेंच जब्योरा आड एक सेट लेगी जिखूंक नाशिल्ली. क्वॉर्टरफायनलीच्या पयल्या सेटांत जब्योरानूच आपलो शेक दवरिल्लो. पूण, मैयान उत्कृश्ट रितीन पुनरागमन करतना बाकीचे दोनूय सेट आपल्या नांवार केले. पयलो सेट वगडायल्या उपरांत मैयान उत्कृश्ट सर्व्हिस केली. दोगूय खेळगडयो 5-5 अशो बरोबरींत आशिल्ल्यो त्या वेळार जब्योरान दोन ब्रेक पॉयण्ट मेळयले. पूण, दोनूय खेपे मैयान तिका जिखपाक दिवंक ना.
जब्योरा स्वता एक ब्रेक पॉयण्ट वाटायलो. पूण, टायब्रेकरांत मैयाच्या बळिश्ट फोरहॅण्डान तिका सेट जिखून दिलो. तिसऱ्या सेटांत मैयान रोखडीच 3-0 अशी आघाडी घेतली. पूण, जब्योरान लेगीत संघर्श करून एक गेम आपल्या नांवार केली. मैया 5-1 अशी मुखार आशिल्ली, त्या वेळार जब्योरान पांच अनपेक्षीत चुकी केल्यो. ताका लागून मैयाचो सेमी फायनलींतलो मार्क मेकळो जालो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
