भांगरभूंय | प्रतिनिधी
म्हापशें: हणजूण्यां हॉटेलाचे कुडींतल्यान पर्यटकांचो 1.20 लाखांचो म्हालवज चोरिल्ल्या प्रकरणांत पुलिसांनी दुबावीत अतुलकुमार बैस (23, मूळ मध्यप्रदेश) हाका अटक केल्या.
बंगळुरू कर्नाटकांतलें एक जोडपें गोंयांत आयिल्लें आनी तें हणजूण्यां गोवा रावंड कॉझी होम्स हॉटेलांत राविल्लें. मंगळारा हें जोडपें कूड बंद करून भायर गेल्लें. तें फांतोडेर परतून कुडींत आयलें तेन्ना कुडींतली भांगराची सरपळी आनी हेर वस्तू मेळून 1 लाख 20 हजार 350 रुपयांचो म्हालवज चोरयेक गेल्ल्याचें तांचे नदरेक आयलें.
हो चोरयेचो प्रकार पुलिशेंत नोंद जाताच पुलिसांनी तपास केलो. त्या वेळार हॉटेलाचो सुरक्षा रक्षक गायब आशिल्ल्याचें कळ्ळें. पुलिसांनी ताकतिकेन सोद घेवन दुबावीत सुरक्षा रक्षकाक धरलो आनी ताचे कडल्यान भांगराची सरपळी जप्त केली. दुबावीत चोरिल्लो म्हालवज घेवन आपल्या गांवांत पळून वचपाचे तयारेंत आसिल्लो. पुलिसांनी ताचे आड गुन्यांव नोंद करून अटक केली. पुलीस उपअधिक्षक जिवबा दळवी, निरिक्षक प्रशल नायक देसाय हांच्या मार्गदर्शना खाला उपनिरिक्षक साहील वारंग, धीरज देविदास, कॉन्स्टेबल रामा परब, सत्येंद्र नास्नोडकार, लक्ष्मण सावळ देसाय आनी रुपेश आजगांवकार ह्या पंगडान ही कामगिरी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.