भांगरभूंय | प्रतिनिधी
डॉ. नारायण देसायः श्री विजयादुर्गा संस्थानाच्या विद्या सहाय्य प्रकल्पाचें उक्तावण
भांगरभूंय । प्रतिनिधी
सावयवेरें: आयच्या काळांत फॅशन म्हूण शिकप चड जालां आनी पॅशन म्हूण शिकप उणावलां. हाका लागून आमची शिक्षणीक गुणवत्ता खुबूच देंवत चल्ल्या. शिक्षणीक गुणवत्ते बाबतींत आमी खुबूच घाळ आसात. आमचे मेंदूंत आशिल्ले सैमीक बुद्दीमत्ते परस आमी कृत्रीम बुद्दीमत्तेचेर चड भर दितात. ताका लागून विद्यार्थ्यांच्या विचार आनी निर्णय घेवपाचे तांकीचेर वायट परिणाम जाला, अशें शिक्षणतज्ञ डॉ. नारायण देसाय हांणी सांगलें.
केरी फोंडेंच्या श्री विजयादुर्गा संस्थान संचालीत विद्या सहाय्य प्रकल्पाचे उक्तावण तशेंच सुरश्री केसरबाई केरकार हायस्कुलाच्या यत्ता धावेची परिक्षा पास जाल्ल्या विद्यार्थ्यांचो कवतूक सुवाळो घडोवन हाडिल्लो. हो सुवाळो हालींच केरीच्या कल्याण मंडपाच्या मंगल सभाघरांत जालो. ह्या वेळार डॉ. देसाय उलयताले.
ह्या वेळार माचयेर मुखेल सोयरी म्हूण हालींच यूपीएससी सिव्हील सर्वीस पर्क्षा पास जाल्ली सौम्या कुमारी, संस्थाचे अध्यक्ष डॉ. संतोष देसाय आनी सचीव राजेंद्र देसाय हाजीर आशिल्ले.
यत्ता धावी पास जावप म्हणल्यार स्वताची जापसालदारकी स्वता घेवप. धावेच्या विद्यार्थांनी आपली कारकीर्द घडयतना स्वताचे निर्णय स्वताच घेवपाक जाय. आपलो खरो सोद घेवपाक जाय. शिक्षण हें दोन पांयांचेर उबें आसा. एक म्हणल्यार आपल्याक कितें जाय तें जाणीवपूर्वक वेंचप आनी दुसरें म्हणल्यार योग्य निर्णय घेवप. आयच्या आधुनीक स्पर्धात्मक युगांत तिगवाचें आसत जाल्यार आमचें मदीं आशिल्ल्या वेगळेपणाचो सोद घेवपाक जाय. जे मेरेन विद्यार्थ्यी आपल्याक कितें आवडटा आनी जमतां ताचे कडेन स्पश्ट ना ते मेरेन विद्यार्थ्यांक आपल्याक कितें करपाचें आसा, ते विशीं अस्पश्टता निर्माण जातली, अशें डॉ. देसाय हांणी सांगलें.
सौम्या कुमारी हांणी सांगलें, धावी जाले उपरांत विद्यार्थ्यांनी आपलो फुडार थारावन ध्येय निश्चीत करपाक जाय. उपरांत तें ध्येय मेळोवचे खातीर खर मेहनत घेवपाक जाय. विद्यार्थ्यांनी सपन निश्चीत पळोवचें, पूण तें पुराय करचे खातीर दीसरात यत्न करचे. कारकीर्द घडयतना आपली तांक आनी कुशळटाय वळखून ज्या मळाचेर आपूण हुशार आसा, त्याच मळाचेर विद्यार्थ्यांनी कारकीर्द घडोवची. डॉ. संतोष देसाय हांणी प्रास्तावीक केलें आनी सोयऱ्यांची वळख करून दिली. सौम्या कुमारी हांचे हस्तुकीं दिवली पेटोवन विद्या सहाय्य प्रकल्पाचें उक्तावण जालें. ते उपरांत श्री विजयादुर्गा संस्थाना वतीन केरीच्या सुरश्री केसरबाई केरकार विद्यालयांतल्या यत्ता धावीची परिक्षा पास जाल्ल्या वट्ट 32 विद्यार्थ्यांचो भोवमान केलो. सौम्या कुमारी हांचोय ह्या वेळार भोवमान केलो. अर्चना हुडेकार हांणी सुत्रसंचालन केलें जाल्यार राजेंद्र देसाय हांणी उपकार मानले.
पालकांक लागुनूच येसः सौम्या कुमारी
आपले जिणेंत येस आनी अपेसाच्या दरेका पांवड्याचेर आपल्याक आवय- बापायन घट तेंको दिलो. आपल्या शिक्षणीक जिणेंत अभ्यासा वांगडाच हेर सहशालेय उपक्रमांतूय आपणें वांटो घेवन बरें व्यक्तीमत्व निर्माण करचे खातीर यत्न केल्यात. हेच खातीर आपल्याक यूपीएससी सारक्या स्पर्धात्मक परिक्षेंत येस मेळ्ळें, अशें सौम्या कुमारी हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
