भांगरभूंय | प्रतिनिधी
सद्या जायत्या जाणांक रक्तदाबाची समस्या आसा. ती फकत जाण्ट्यांकच न्हय तर तरणाट्यां मदींय दिसता. रक्तदाबाच्या समस्यांक लागून काळजाच्या दुयेंसांचो धोको वाडटा. पूण, जायते जाण ताचे कडेन एक सामान्य समस्या म्हणून दुर्लक्ष करतात. हाका लागून संवसारभर जायत्या जाणांक रक्तदाब दुयेंसाची लागण जाता.
उण्या रक्तदाबाचीं सामान्य लक्षणां म्हळ्यार घुंवळ येवप वा दुयेंसाची जाणविकाय जावप. पूण, उणो रक्तदाब होय एक सामान्य प्रस्न न्हय, वेळार उपचार केलो ना जाल्यार काळजाचे दुयेंस, स्ट्रोक, मूत्रपिंड अपेशी जावप अशा जायत्या समस्यांक तोंड दिवचें पडटा. उण्या रक्तदाबाची समस्या घरांतल्या घरांत सोडोवंक मेळटा. हाचे खातीर कांय घरगुती उपाय करचे पडटात. रक्तदाब म्हळ्यार बीपी तपासपाचो सल्लो दोतोर सदांच दितात.
रक्तदाब उणो जावपाचीं कारणां…
जेन्ना कुडीक फावो तितलें उदक मेळना तेन्ना रक्ताचें प्रमाण उणें जावंक लागता. हाका लागून रक्तपेशींतल्यान रक्त पंप करपाक काळजाक चड कश्ट घेवचे पडटा. हाका लागून रक्तदाब उणो जाता. डिहायड्रेशन जावचें न्हय म्हूण भरपूर उदक पियेवचें. गुरवारपणांत रक्तदाब चड करून देंवता, अशें दिसता. अशे परिस्थितींत खाशेली जतनाय घेवप गरजेचें आसा.
काळजा कडेन संबंदीत समस्यांक लागून कुडींतल्या रक्तभिसरणांत आडमेळीं येतात. जाका लागून रक्तदाब उणो जाता. काळीज सारकें काम करीना जाल्यार कुडीची गरज भागोवपा इतलें रक्त पंप करपाक मेळना, जाका लागून रक्तदाब उणो जावंक शकता. कुडीक जाय आशिल्ल्या पोशक तत्वांचो उणावूय रक्तदाब उणो जावपाचें कारण. जीवनसत्व बी 12 आनी लोखण ह्या कांय पोशक तत्वांचो उणाव जाल्यार दुवळेंपण येवंक शकता, जाका लागून रक्तदाब उणो जावंक शकता.
रक्तदाब देंवल्यार…
मिठाचे फायदे आनी लुकसाण अशे दोनूय प्रकार आसात. तांचे चड प्रमाणांत सेवन केल्यार धोक्याचे आनी उणें सेवन केल्यारय तितलेंच धोक्याचे आसा, देखून भलायकेक बरो रक्तदाब मेळोवपा खातीर मीठ मध्यम प्रमाणांत सेवन करचें. फळां आनी भाजयो हातूंत मेळपी सैमीक मीठ खावपा वांगडाच आमच्या आहारांतय योग्य प्रमाणांत मीठ सेवन करपाक जाय. तुमचे कुडींतल्या उदकांचे प्रमाण उणें जावपाक दिवचें न्हय. कुडींत फावो तें उदक तिगोवन दवरपाक शुद्ध द्रव भरपूर पियेवचें. हाका लागून रक्तदाब जावपाक कारणीभूत जावपी डिहायड्रेशनची समस्या जावची ना.
फावो त्या प्रमाणांत कॅफीन आसल्यार तुमचो रक्तदाब स्थीर दवरपाक मजत जावंक शकता. तुळशीच्या पानांत जायते पोशक तत्व आसतात. तातूंत मॅग्नेशियम, पोटॅशियम आनी जीवनसत्व सी आसता. तशेंच तातूंत युजेनॉल नांवाचें अँटीऑक्सिडंट आसता जें रक्तदाब नियंत्रीत करपाक मदत करता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.