भांगरभूंय | प्रतिनिधी
भांगरभूंय । प्रतिनिधी
पोरणे गोंयः सरकाराच्या प्रसाद येवजणे खाला पोरण्या गोंयांतल्या चर्च संकुलाक जाय त्यो सुविधा मेळोवन दिवपाचें काम फावो ते दिकेन चल्लां अशें पर्यटन मंत्री रोहन खवंटे हांणी सांगलें. पुरातत्व खात्याचे अधिकारी तशेंच चर्च अधिकाऱ्यां वांगडा खवंटे हांणी चर्च वाठाराची पळोवणी केली. पोरण्या गोंयांतल्या चर्चींक सुविधा उपलब्द करून दिवपा खातीर प्रसाद येवजण चालीक लायल्या अशें ताणे सांगलें.
पोरण्या गोंयांतल्या दायज वास्तूंची राखण तशेंच वाडट्या संख्येन येवपी पर्यटकांच्यो गरजो पुराय करपाचें काम आमकां करचें पडटले. प्रसाद येवजण चालीक लावपा खातीर सगळ्य हितसंबंदियांक, सगळ्या सबंदित खात्यांक विश्वासांत घेवपा खातीर आमी बसका घेतिल्ली. तातूंत सादरीकरण करून कितें करपाची गरज आसा हे विशीं चर्चा केली अशी म्हायती खवंटेन दिली.
चर्च वाठारांत सुविधा तयार करपा खातीर पुरातत्व सर्वे, एनएमए आनी केंद्रीय आयोगा कडल्यान जाय ते परवाने मेळोवपा खातीर केंद्रीय पर्यटन मंत्री किशन रेड्डी आनी मुख्यमंत्री डॉ प्रमोद सावंत हाचे वतीन यत्न चल्ल्यात. 2024 वर्सा पोरण्या गोंयांत पवित्र अवशेशांचें प्रदर्शन जातलें. देश- विदेशांतल्यान ते खातीर व्हडा संख्येन भाविक येतले. ताका लागून आमकां सुविधा उपलब्द करून दिवपा खातीर फाटी रावंन उपकरचें ना अशें रोहन खवंटेन सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
