भांगरभूंय | प्रतिनिधी
भांगरभूंय । प्रतिनिधी
पर्वरीः साळगांव गट काँग्रेसचो अध्यक्ष अॅड अतुल नायक, उत्तर गोंय काँग्रेस जिल्हो अध्यक्ष वीरेंद्र शिरोडकार, काँग्रेस पक्षाचो सरचिटणीस विजय भिके आनी हेरांनी बांदकाम खात्याच्या उदका पुरवण विभागाचो कार्यकारी अभियंतो शंभू मालवणकार हाची भेट घेवंन साळगांव मतदारसंघातल्या लोकांक सारकी उदका पुरवण करपाची मागणी केली. हे संबंदी तांणी मालवणकार हाका एक निवेदन भेटयलें.
साळगांव मतदारसंघात सध्या पियेवपाच्या उदकाचो सामको उणाव आसा. नळाक उदक सोडपाचो फिक्स असो वेळ ना. पिळर्णच्या लोकांक फातोडेर 3 वरांचेर उदक मेळटा जाल्यार वेरे हांगा सकाळीं 9 वरांचेर उदक येता. नेरूल आनी रेईशमागुश वाठाराक टॅन्करान उदका पुरवण करतात मात तांका गळटी लागल्या ही गजाल तांणी मालवणकाराचे नदरेक हाडून दिली. पिळर्ण हांका उदकापायप लायनीक जायते कडेन गळटी लागल्या. प्लंबीक सामान नाशिल्ल्यान ती सारकी करपाक वेळ लागला अशें मालवणकारान सांगतगीर बांदकाम खातें कळाव लायता ताचो फायदो टॅन्कर माफिया घेतात अशें काँग्रेस फुडाऱ्यांनी सांगलें.
पर्वरी वाठाराक 17 एमएलडी उदकाची दिसपट्टी गरज लागता. 14 एमएलडी उदक पर्वरी उदका शुद्धिकरण प्रकल्पांतल्यान मेळटा हेर 3 एमएलडी अस्नोडें उदका प्रकल्पांतल्यान हाडटात.वेरें आनी हेर वाठाराक एक दीस सोडून सकाळीं 9 वरांचेर उदक सोडटात. रेईश मागुश वाठारांत टाकयेंत उदक साठयल्या उपरांत तें सोडटात. कांय घरां उंचायेर आशिल्ल्यान थंय मेरेन उदक प्रेशरान वचना. थंय टॅन्कारांनी उदका पुरवण करची पडटा अशें मालवणकारान पत्रकारांक सांगलें
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
