हद्दाद मैयान इतिहास घडयलो

भांगरभूंय | प्रतिनिधी

ब्राझिलाची बिट्रीज हद्दाद मैयान स्पेनाचे सारा सोरिबेस टोर्मोक हारोवन फ्रॅंच ओपनाचे क्वॉर्टरफायनलींत सुवात मेळयली. मैयान तीन वरां आनी 51 मिनटां मेरेन चलिल्ले मॅचींत साराक 6-7 (3), 6-3 आनी 7-5 अशा तीन सेटांनी हारयली.

ह्या जैता सयत मैया 55 वर्सांनी फ्रॅंच ओपनाचे क्वॉर्टरफायनलींत सुवात मेळोवपी ब्राझिलाची पयली बायल खेळगडी थारली. तिचे आदीं म्हणल्यार 1968त मारिया बुएनोन फ्रॅंच ओपन आनी विम्बल्डनाचे क्वॉर्टरफायनलींत सुवात मेळोवपा खेरीत अमेरीकन ओपनाचे सेमी फायनलींत सुवात मेळयिल्ली. ह्या दोगां खेरीत ब्राझिलाच्या एकेय बायल खेळगडयेक ग्रॅण्ड स्लॅमाचे एकेय सर्तीचे क्वॉर्टरफायनलींत सुवात मेळोवपाक जमूंक ना.

मैया क्वॉर्टरफायनलींत मैया ट्युनिशियाचे ओन्स जब्योरा आड खेळटली. जब्योरान प्री-क्वॉर्टरफायनलींत अमेरिकेचे बर्नांडा पेराक 6-3 आनी 6-1 अशा गोल फरकांनी हारयली. सातव्या सिडा वयल्या जब्योरान प्रतिस्पर्धी खेळगडेचें आव्हान फकत 63 मिनटांनी सोंपयलें.

मजगतीं, दादल्यांच्या एकोड्या गटांत नॉर्वेंच्या कॅस्पर रुडान चिलीच्या निकोलस जॅरीक 7-6 (3), 7-5 आनी 7-5 अशा तीन सेटांनी हारयलो. चवथ्या सिडा वयल्या गॅस्पराक जैत जोडपाक तीन वरां आनी 20 मिनटां मेरेन संघर्श करचो पडलो. फुडले फेरयेंत गॅस्पर डॅनमार्काच्या होल्गर रुने आड वा अर्जेंटिनाच्या फ्रान्सिस्को सेरुंडोलो आड खेळटलो.