भांगरभूंय | प्रतिनिधी
आयच्यान सिंगापूर ओपन सुपर 750 सर्तीक सुरवात जाता. आदली वस्ताद भारताची पी व्ही सिंधू थायलॅण्ड ओपनांतलें बाबत प्रदर्शन विसरून फॉर्मांत येवपाची यत्न करतली. जाल्यार फॉर्मांत आशिल्लो एच एस प्रणय लेगीत जैताची लय कायम राखपाक इत्सूक आसतलो.
पोरूं ऑगस्टांत सिंधूचे खोटेक दुखापत जाल्ली. तेन्ना सावन तिचे खातीर परिस्थिती बदल्ल्या. पूण, हालींसाराक ती ल्हवल्हव फॉर्मांत येवपाक लागल्या. माद्रिदांत स्पेन मास्टर्साचे फायनली मेरेन आनी मलेशिया मास्टर्साचे सेमी फायनली मेरेन पाविल्ली. पूण, थायलॅण्ड ओपनांत तिचें आव्हान पयलेच फेरयेंत सोंपिल्लें.
सिंगापूर ओपनांत तिची पयली मॅच संवसारीक क्रमवारींत पयले सुवातेर आशिल्ले जपानाचे अकाने यामागुची आड खेळटली. सिंधूचें तिच्या आडचो रॅकॉर्ड 14-9 असो आसा. पूण, पोरूं थायलॅण्ड ओपनांत एकामेका आड खेळ्ळ्या उपरांत परिस्थिती बदल्ल्या. ताका लागून आयज तिच्या आड जैत जोडपाक सिंधूक सर्वोत्कृश्ट प्रदर्शन करचें पडटलें.
दुसरे वटेन प्रणय स वर्सां सावन चालू आशिल्लो किताबाचो दुकळ सोंपोवपाक इत्सूक आसतलो. हालींच जाल्ली मलेशिया मास्टर्स सर्तीचो किताब जिखिल्लो. ताची पयली मॅच जपानाच्या कोडाई नाराओका आड जातली. थायलॅण्ड ओपनाचे सेमी फायनलींत हारपी लक्ष्य सेनाची पयली मॅच चीनी तायपेच्या चोउ तियेन चेन आड जातली.
2021चे संवसारीक चॅम्पियनशिपींत रुप्या पदक जिखपी किदाम्बी श्रीकांत थायलॅण्डाच्या केंटाफोन वांगचारोन आड खेळटलो. जाल्यार प्रियांशू राजवताची पयली मॅच जपानाच्या केंटा सुनेयामा आड खेळटलो.
बायलांच्या एकोड्या गटांत सायना नेहवाल थायलॅण्डाचे रेचानोक इंतोनोन आड खेळटली. तिच्या आडच्यो दोनूय मॅच सायना हारल्या.
दादल्यांच्या दोट्टी गटांत संवसारीक क्रमवारींत चवथे सुवातेर आशिल्ली चिराग शेट्टी-सात्विक साईराज रंकीरेड्डी ही जोडी जपानाचे अकिरा कोगा आनी ताईची सेइतो हिच्या आड खेळटली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
