भांगरभूंय | प्रतिनिधी
भांगरभूंय । प्रतिनिधी
काणकोणः फुडल्या दोन- तीन वर्सांत काणकोण पालिका वाठार प्लास्टिक मुक्त करपाची मोख काणकोणच्या गोंयकार हे बिगर सरकारी संस्थेन दवोरल्या. नितळसाणेच्या वावरांत आशिल्ल्यांचो भोवमान आनी लोक जाग्रुताय कार्यावळींनी आमी संवसारीक पर्यावरण दीस मनयतले अशें गोंयकाराचो सरचिटणीस विकास भगत हाणे एके पत्रकार परिशदेंत सांगलें. तांच्या वांगडा व्ही फॉर पाळोळेचे गास्पार कुतिन्हो आनी फ्रेन्ड्स ऑफ काणकोणचो लॉयड गुदिन्हो आशिल्लो.
गोंयकार ही संघटना फाटल्या 9 वर्सां सावन कोयराच्या विशयाचेर काम करता. फुडल्या दोन तीन वर्सांत पुराय काणकोण पालिका वाठार प्लास्टिक मुक्त करपाची येवजण आमी तयार केल्या. काणकोण पालिका मंडळ घरांनी वचून ओलो आनी सुको कोयर एकठांय करता. आमची संघटना रस्त्या कुशीक वडयल्लो कोयर एकठांय करपाचें काम करता. ते खातीर सायकलींनी वचून व्हो कोयर एकठांय करपाक आमी मनीश नेमियार केल्यात अशें विकास भगतान सांगलें.
फ्रेंड्स आफ काणकोणान तेंबवाडो तें कोळंब मजगतीचो रस्तो नितळ दवोरपाचें थारायलां. ते खातीर सायकलीन फिरून रस्त्या वयलो कोयर एकठांय करपाचें काम करतले अशें लॉयड गुदिन्होन सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
