भांगरभूंय | प्रतिनिधी
खबरां संस्था
पुणेः भारतीय कुस्ती म्हासंघाचो अध्यक्ष ब्रिजभूषण शरण सिंह हाचे आड नवी दिल्लींत सुरू आशिल्ले घडामोडींचेर आमचें लक्ष आसा. ह्या प्रकरणाचेर फावो त्या वेळार आमी उलयतले अशें महाराष्ट्र राज्य कुस्ती परिशदेचो अध्यक्ष शरद पवार हांणी सांगलां. महाराष्ट्राचो कुस्तीगिरांक सदांच तेंको आसतलो अशेंय तांणी स्पश्ट केलां.
बऱ्याच तेपा उपरांत शरद पवार हाचे येजमानके खाला महाराष्ट्र कुस्ती परिशदेची बसका जाली. ह्या वेळार परिशदेचे 80 वांगडी हाजीर आशिल्ले. ब्रिजभूषण हाचे येजमानके सकयल्ले राष्ट्रीय समितीन राज्य कुस्ती परिशदेचेर अस्थायी समितीची नियुक्ती केल्या. तरी न्यायालयान कुस्ती परिशदेकूच मान्यताय दिवूं ना. ताका लागून दिल्लींत सुरू आशिल्ल्या घडामोडींचेर लक्ष दवोरून आमी आमचें काम सुरू दवोरपाचें थारायलां अशें पवार हांणी सांगलें. महाराष्ट्रांत बायलांची महाराष्ट्र केसरी आनी भुरग्यांची सर्त जाल्या. आतां दादल्यांची महाराष्ट्र केसरी कुस्ती सर्तीची तयारी सुरू करपाचें बसकेंत थारलें.
खेळां मंत्रालयान भारतीय कुस्ती म्हासंघाचेअधिकार घेतल्यात आनी वेंचणूक घेवपा खातीर अस्थायी समितीची नियुक्ती केल्या. भारतीय ऑलिम्पीक संघटनेन नियुक्त केल्ले समितीन वेंचणुको जाहीर केल्या ती ते प्रमाण आपली कार्यवाही कररपाची अशें आमी थारायलां अशें ताणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
