भांगरभूंय | प्रतिनिधी
खबरां संस्था
नवी दिल्लीः भारत आनी ऑस्ट्रेलिये मजगतीं बुधवार 7 जूना सावंस वर्ल्ड टॅस्ट चॅम्पियशनशीप (डब्ल्ल्यूटीसी) फायनल जातली. हे मॅची पयलीं ऑस्ट्रेलिया पंगडाक व्हडलो धपको बसला. तांचो फास्ट बॉलर जोश हेझलवूड हे मॅची खातीर ऑस्टेलियन पंगडांत आसचो ना. ताचे सुवातेर मायकल नासेराचो आसवाप केला.
हेझलवूड पंगडांतल्यान भायर पडप पॅट कमिन्साच्या पंगडा खातीर बरे संकेत न्हय. हाचे पयलीं हेझलवूड दुखापतीक लागून अंदूच्या आयपीएलांत अर्द्या परच चड मॅची खेळपाक शकलो ना. आरसीबी खातीर निमाण्यो कांय लीग मॅची तो खेळल्लो. ताका मॅचींतल्यान भायर काडपाची घोशणा आयसीसीन आपले वेबसायटीर केल्या. ताची सुवात घेवपी मायकेल नासेरान ऑस्ट्रेलिये कडल्यान दोन टॅस्ट आनी दोन वन-डे मॅची खेळ्ळा.
डब्ल्यूटीसी खातीर ऑस्ट्रेलियन पंगड फुडले भशेन आास- पॅट कमिन्स (कॅप्टन), स्कॉट बोलँड, अॅलेक्स कॅरी (विकेटकीपर), कॅमेरॉन ग्रीन, मार्कस हॅरिस, ट्रॅव्हिस हेड, जोश इंग्लिस (विकेटकीपर), उस्मान ख्वाजा, मार्नस लॅबुशेन, नॅथन लायन, टॉड मर्फी, मायकेल नेसर, स्टीव्ह स्मिथ, मिचेल स्टार्क, डेव्हिड वॉर्नर.
भारत दुसरे फावट फायनलींत
लंडनांतल्या ओव्हल मैदानार डब्ल्यूटीसी फायनल जातली. भारत दुसरे फावट हे सर्तीचें फायनलींत पावला. 2021 वर्सा भारताक फायनलींत न्यूझिलंडा कडल्यान हार खावची पडिल्ली. ही मॅच पावसाक लागून 6व्या दिसा जाल्ली. इंग्लंडांतलें हवामान लहरी आशिल्ल्यान केन्ना पावस पडटलो हाचो भरवसो आसना. पावसाक लागून कितेंय जालें आनी मॅच ड्रॉ जाल्यार चॅम्पियन कोण जातलो व्हो प्रश्न आसा. आयसीसीच्या नेमा प्रमाण जर फायनल मॅच ड्रॉ जाल्यार भारत आनी ऑस्ट्रेलियेक जोड जैतिवंत म्हणून जाहीर करतले.
आयपीएल सोपले उपरांत भारतीय पंगडांतले खेळगडे लंडनांत दाखल जाल्यात. तांणी सराव लेगीत सुरू केला. कॅप्टन रोहीत शर्मा आनी कोच राहुल द्रवीड हांच्या सामकार पंगड वेंचून काडपाचें व्हडलें आव्हान आसा. फाटले खेपे फायनलींत भारतान पंगडांत दोन स्पिनर घेतिल्ले आनी पंगडाक हार खावची पडिल्ली. ह्या वेळार रोहीत शर्मा कसलो निर्णय घेतलो हाचे कडेन सगल्यांची नदर आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
