टॅस्ट क्रिकेटींत स्टोक्सान रचलो इतिहास

भांगरभूंय | प्रतिनिधी

खबरां संस्था
लंडनः लॉर्ड्सार जाल्ले इंग्लंड आनी आयर्लंड हाचे मदली एकुसरी टॅस्ट मॅच इंग्लंडान 10 विकेटींनी जिखली. आयर्लंडाचो पयलो डाव 56.2 ओव्हरींत 172 धांवड्यांत सोपले उपरांत इंग्लंडान आपलो पयलो डाव 4 आवट 524 धांवड्यांचेर घोशीत केल्लो.
आपल्या दुसऱ्या डावांत आयर्लंडांत 9 विकेटी वोगडावन 362 धांवड्यो केल्यो आनी इंग्लंडाक जैता खातीर 11 धांवड्यांचें लक्ष्य दिलें. तांणी 4 बॉलांत ह्यो धांवड्यो केल्यो. इंग्लंडाचो कॅप्टन बेन स्टोक्सान एक आगळो वेगळो विक्रम करून टॅस्ट क्रिकेटींत एक इतिहास रचलो. ह्या जैता सयत तो टॅस्ट क्रिकेटीच्या 145 वर्सांच्या इतिहासांत बँटिंग, बॉलींक व विकेटकीपिंग शिवाय मॅच जिखपी पयलो कॅप्टन थारलो.
बेन स्टोक्स न्हय तर इंग्लंडान लेगीत हे टॅस्ट मॅचींत इतिहास रचलो. इंग्लंडान आयर्लंडा आड 6.33 चे धांवगतीन 524 धांवड्यो केल्यो. हाचे पयलीं पाकिस्तानात तांणी 6.50चे धांवगतीन 657 धांवड्यो केल्ल्यो. टॅस्ट मॅचीच्या 145 वर्सांच्या इतिहासांत खंयच्याय पंगडान टॅस्ट मॅचीच्या एका डावांत 6.00 धांवगतीन 400 धांवड्यो करूंक नात. इंग्लंडा वतीन पयल्या डावांत ऑली पोपान 205 आनी बेन डक्टान 182 धांवड्यो केल्यो. डक्टान 178 बॉलांत 24 चौके आनी एक सको मारलो. ओली पोपान 208 बॉलांत 22 चौके आनी 3 सके मारले.
आयर्लंडा वतीन दुसऱ्या डावांत अँडी मॅकब्रायन 86 धांवड्यो करून नाबाद रावलो. ताणे 115 बॉलांत 14 चौके मारले. मार्क एडेरान 76 बॉलांत 12 चौके आनी 2 सक्यांनी 88 धांवड्यो केल्यो. हे मॅचींत इंग्लंडाच्या जोश टंगान टॅस्ट क्रिकेटींत पदार्पण केलें. पयल्या डावांत ताका एकूय विकेट मेळ्ळी ना. दुसऱ्या डावांत ताणे 20 ओव्हरींत 66 धांवड्यो दिवंन 5 विकेटी घेतल्यो.