भांगरभूंय | प्रतिनिधी
मेकळे सुवातेचेर कोयराच्यो राशीः संबंदितांचेर कारवाय करपाची मागणी
भांगरभूंय । प्रतिनिधी
मुरगांवः वास्को बेलाबाय- चिरकूनउडी वाठारांत गोंय खेळां प्राधिकरणाचे (साग) मालकीचे सुवातेंत मुरगांवांतलो दुसरो कोयर प्रकल्प उबो जाता, असो दुबाव येता. ती सुवात वास्को टिळक मैदानाचेर राज्य, राष्ट्रीय, आंतरराष्ट्रीय फुटबॉल मॅची पळोवपाक येवपी प्रेक्षकांच्यो गाडयो दवरचे खातीर राखीव दवरिल्ली. पूण वास्कोच्या गोवा शिपयार्ड कंपनीन ते सुवातेंत आपल्या आस्थापनांत दोन व्हड इमारती आनी शिपयार्डाचो विस्तार करचे खातीर काडिल्ल्या फायलींग मातयेची रास हाडून उडयल्या. सध्या ते सुवातेचेर कावलाक काडिल्ल्या गाडयां वांगडाच खाजगी बशी दवरून अतिक्रमण केलां. वास्को बेलाबाय- चुरकूनउडी सध्या वास्को वाठारा सयत दाबोळींतलो कोयर उडयतात, अशी म्हायती मेळ्ळ्या. ती सागाची सुवात सरकारी यंत्रणेचो गैरवापर करून शेत जमीन पुरयल्या. अंदूं राष्ट्रीय खेळां सर्ती गोंयांत जावपाच्यो आसात. खेळां विभागांतल्यो फुटबॉल मॅची खेळोवपा खातीर टिळक मैदानाचो निश्चीत वापर करतले. ह्यो मॅची पळोवपाक येवप्यांक आपल्यो गाडयो दवरपा खातीर हे सुवाते बगर दुसरी सुवात ना. ताका लागून सागान हे सुवातेचो गंभीरपणान विचार करचो. जांणी हे सुवातेचेर अतिक्रमण केलां, तांचेर कारवाय करची, अशी खेळां मोग्यांनी मागणी केल्या. तशेंच हे सुवातेचेर दीसरात सुरक्षा नेमचो अशीय तांणी मागणी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
