भांगरभूंय | प्रतिनिधी
झाडां ही आमची व्हडली संपत. तीं आसात म्हूण आमी आसात. तीं आमकां भरभरून प्राणवाय, सावळी आनी फळां दितात. जेन्ना कोरोना जालो तेन्ना प्राणवाय चें खरें मोल सगळ्यांक कळून आयलें. फुकट मेळटा त्या वस्तूचो वालोर आमका केन्नाचं नासता त्या खातीर अनुभव हीच खरी शिकवण म्हणू येता. अशी ही जीवन दिवपी जिवनदायीनी झाडां. अशेंच एक झाड जाका आमच्या जिवीतांत धार्मिक नदरेन एक मानाचें स्थान आसा, तें म्हळ्यार वडाचें झाड.
वड हो एक असो रुख जो शेंकड्यांनी म्हळ्यार अनंत वर्सां जगता. तो मनशाची दर एक पिळगी पळयता. ल्हान, व्हड, जाणटीं, नेण्टीं, नातरां, पंटुरां सगळ्यांचेर ताची नदर. कसलीच अपेक्षा करीनासतना तो आमकां भरभरून दिता जणू हाका अमरत्वच देवान दिलां अशें म्हणल्यार अतिताय जावची ना. जसो दिसपाक घसघशीत तसोच मनानूय घसघशीत. हिंदूंक धर्मीक नदरेन हो रुख खूब म्हत्व आसा. पुण्यत्वान भरिल्लें अशें हें झाड. बायलां ह्या वडाची पूजा करतात, त्या पुजेक आमी ‘वडापुनव’ अशें
म्हणटात.
वडा पुनव सवायशीण बायल मनयता. तांचे खातीर ही एक व्हड अशी परब. सवायशिणीचो कुंकूम राखपाचें काम हो वड करता म्हळ्यार दर बायलेच्या घोवाची भलायकी तशेंच जिवीत तोच सांबाळटा. वडाक दोर बांदून प्रदक्षिणा घेत- घेत बायलो वडाची पूजा करतात. तशेंच बाकीच्या सवायशीण बायलांक दोणो वाट्टात. दोण्यांत तरातरांचो फळांचो पनवार घाल्लो आसता.
वडापुनव मनोवपा फाटल्यान सावित्री- सत्यवानाची कथा आसा. आपल्या घोवाक बरें आरोग्य आनी आयुश्य मेळचें म्हूण हिंदू बायलां ही वडाची पुजा करतात. जेन्ना सावित्रीक कळ्ळें की सत्यवानाचो जीव गेलो म्हूण, ती ताका वडा म्हऱ्यांत घेवन गेली. तिका वडाचें म्हत्व खबर आशिल्लें. बाकीच्या झाडां परस वड हवेंत चड प्रमाणांत प्राणवाय सोडीत आसता आनी त्या वेळार तिच्या घोवाक प्राणवायुच जाय आशिल्लो. यमान व्हेल्लो सत्यवानाचो जीव ह्याच वडा सकयल ताका परत दिवचो पडलो, अशी कथा आसा.
जाच्या घरा लागसार वडाचें झाड आसा तो मनीस खरेच भाग्यवान म्हणपाचो. वड त्या घराची तशेच घरच्यांची राखण करता. भरभरून प्राणवाय तर दिताच, पूण बऱ्या भलायकीचो आशीर्वादूय दिता. वडा सारको एक रुख आसल्यार प्राणवाया खातीर भिवपाची गरज ना. “एक झाड कातरल्यार धा लायात”. सावळी पयशे दिवन मेळचीना, ती झाडांच दिवपाक शकतलीं. तांकां
सांबाळात आनी जपात. तीं तुमकां सांबाळटली. सगळ्यांक वडापुनवेची हुनहुनीत परबी.
शिल्पा लाड
8411007204
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
