भांगरभूंय | प्रतिनिधी
दाल्गादो कोंकणी अकादमीन गोंय घटक राज्य दीस उमेदीन मनयलो
पणजी: गोंयांक घटक राज्य मान्यताय मेळोवन दिवंक साबार गोंयकारांनी आपलो वेळ आनी आपली जीण अर्पण केली. तांच्या उपकारांत आमी गोंयकारांनी रावपाची गरज आसा. तशेंच गोंयच्या बर्या खातीर आमी वावुरया. म्हाका कित्याक पडलां दुसरो करतलों म्हूण हांव सुस्त पळयत बसलों जाल्यार गोंय आमच्या हातांतल्यान निसरून दुसर्याच्या हातांत पडूंक वेळ लागचो ना. हाचो भान दवरूया. आमचें गोंय आमी सांबाळुया. आमच्या गोंयची आमी काळजी घेवया आनी आमचे वतीन जाता तें करून आमी गोंयकार गोंयां पासत वावुरतले म्हूण दाखोवन दिवया अशें थॉमस स्टिवन्स कोंकणी केन्द्राचे, पर्वरीचे आदले संचालक आनी आतांचे संयोजक फादर जुजे सिल्वेर हांणी सांगलें.
दाल्गादो कोंकणी अकादेमीन 30 मे दिसा गोंय घटक राज्य दीस उमेदीन मनयलो. स. रेजिनाल्ड फेर्नांडीस सभाघरांत आयोजीत केल्ल्या सुवाळ्यांत पाद्री सिल्वेरा मुखेल सोयरे म्हूण उयलताले.
ह्या वेळार दाल्गादोचे अध्यक्ष सेल्सो फेर्नांडीस, सचीव पाद्री मायरन जेसन बार्रेटो, आदले अध्यक्ष प्रेमानंद लोटलीकार, आदले अध्यक्ष तोमाझीन कार्दोज, आदले अध्यक्ष विन्सी क्वाद्रूस आनी हेर वांगडी आनी मानेस्त हाजीर आशिल्ले.
मुखार उलतना फादर जुजे सिल्वेर हांणी म्हळें, गोंयाक मेकळें राज्य म्हूण मान्यताय मेळ्ळीं खरीं पूण ती राखून तिगोवन दवरपाची जापसालदारकी दरेका नागरीकाची आनी दरेका गोंयकाराची. गोंय सुदारता वा बिगाडटा हाचेर नियाळ करून, आवाज उठोवन साबार गोंयकार जागृताय हाडटात. आमचो तेंको सांगात, एकवठ भोव गरजेचो जावन आसा. ही मान्यताय जी आमकां मेळ्ळ्या तो आमचो स्वाभिमान. तो स्वाभिमान राखून दवरप गरजेचो. आमचें गोंय सांबाळूंक आनी बरेंपण आशेवंक आमचें गोंय आमच्याच फुडाराच्या हातांत घालां. आमी ताची जापसालदारकी घेवची आसा अशेंय पाद्रीन म्हळें.
ह्या वेळार दाल्गादाचे अध्यक्ष सेल्सो फेर्नांडिसान मानेस्तांक येवकार दितना म्हळें, म्हालगड्यांनी त्याग करून जायतें आमकां सांबाळून दवरलें. तातूंतलें एक गोंय घटक राज्य. ह्या दिसाची शाबासकी आनी परबीं दितां. हो इतिहास हे पिळगेक दिवंक आयच्या दिसा आमच्या कविंनी आपली कविता सादर करून उमाळे उगते करून. आपलो हुस्को, मोग आमच्या गोंयां खातीर दाखोवंक डिकेए कविता उत्सव घडोवन हाडलो. फुडाराक असल्या साबार कार्यावळींचें आयोजन करतले अशें तांणी सांगलें.
सचीव पाद्री मायरन जेसन बार्रेटोन उपकार मानले. जाल्यार सोनिया गोम्स हिणें सुत्रसंचालन केलें.
ह्या वेळार गोंय घटक राज्य ह्या विशयाचेर साबार कवींनी आपल्यो सुंदर कविता सादर केल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
