भांगरभूंय | प्रतिनिधी
रामचंद्र गर्दे : दिवचल हायस्कुलांतल्यान पयल्या तीन क्रमांक मेळयल्ल्या विद्यार्थ्यांचो भोवमान
दिवचल: आयच्या भुरग्यांनी स्वताची उदरगत करतना विवीध मळार परिपुर्णपणान अभ्यास करचो. शिक्षणांत जावपी बदलांचेर पालकांनीय सादूर रावचें. विद्यार्थ्यांनी बुदवंत भाग, भावनीक भाग आनी समाजीक भाग हांचो मेळ घालून आपल्या व्यक्तीमत्वाची उदरगत करची. आयच्या भुरग्यांनी सदांच उत्कृश्टताये खातीर यत्न करचो. आपले भितर आशिल्ले कलागूण सोदून ताचेर आनीक भर दिवची, अशें शिक्षणतज्ञ आनी आयडियल हायस्कूल पिळगांवचे आदले हेडमास्तर श्री रामचंद्र गर्दे हांणी सांगलें. सम्राट क्लबान आयोजीत केल्ल्या दिवचल हायस्कुलांतल्यान पयले तीन क्रमांक मेळयल्ल्या भोवमान सुवाळ्याक ते मुखेल सोयरे ह्या नात्यान उलयताले. ह्या वेळार सम्राट क्लबाचे अध्यक्ष निलेश टोपले, सचीव डॉ. प्रवीण सावंत, गोपाळ मोरजकार, शेखर नायक आनी हेर मानयेर हाजीर आशिल्ले.
ह्या वेळार दिवचलचे गिरीश वझे हांणी पुणेच्या भारती विद्यापीठांतल्यान मास्टर इन परफोर्मींग आर्टस् संगीत मळावेल्या बांसरींत पद्वी मेळयल्ल्यान ताचो दिवचल सम्राट क्लबा वतीन खासा भोवमान केलो.
तशेंच गोवा बोर्डान अंदूं घेतिल्ले शालांत परीक्षेंत दिवचलच्या हायस्कुलांतल्या पयल्या तीन क्रमांक मेळयल्ल्या मदीं श्री शांतादुर्गा हायस्कुलाच्या श्रवण सुबोध कांसार, श्रेयस श्रीधर सावंत, मधूर चंदशेखर नार्वेंकार, अवरलेडी ऑफ ग्रेस हायस्कुलांतल्या स्वरा शिवदास पळ, सानिशा प्रशांत मळीक, आर्या चिराग तिरोडकार, राधाकृष्ण हायस्कुलांतल्या गावडे, रोहीत कुमार मुखीया, भुवना मंगेश देसाय, तशेंच छत्रपती शिवाजी महाराज संकूल सरकारी हायस्कुलांतल्या पुजा गोडेगीरी, बागेश्री विजय जाधव, साहील कुमार पासवान हांचो ह्या वेळार भोवमान जालो. सगळ्या विद्यार्थ्यांचो मुखेल सोयरे गर्दे हांचे हस्तुकीं यादस्तीक भेटोवन केलो.
ह्या वेळार सम्राट क्लबाचे अध्यक्ष निलेश टोपले हांणी येवकार दिलो. प्रास्तावीक आनी कार्यावळीचें सुत्रसंचालन डॉ. प्रवीण सावंत हांणी केलें. निमाणें शेखर नायक हांणी उपकार मानले.
सम्राट क्लबा वतीन ह्या वेळार मानेस्तांक भेटवस्त भेटयल्यो. हो सुवाळो येसस्वी करपा खातीर सम्राट राहुल कवळेंकार, विश्वास गांवस, संतोष माशेलकार, रोहिदास गाड आनी हेर सम्राट पदाधिकार्यांनी विशेश मेहनत घेतली. ह्या वेळार भुरग्यांचे पालक, शिक्षक हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
