भांगरभूंय | प्रतिनिधी
भारताचो 17 वर्सां पिराये सकयलो ग्रॅण्डमास्टर डी गुकेशाक पयले खेपे नॉर्वे ग्रॅण्डमास्टर बुद्दीबळ सर्तींत खेळपाची संद मेळ्ळी आनी सर्तीच्या पयल्याच दिसा ताणें संवसारीक क्रमवारींत दुसरे सुवातेर आशिल्ल्या अलिरेझा फिरौजाक हारोवन उत्कृश्ट सुरवात केली.
काळ्या घुलांनी खेळपी गुकेशान इटालीयन ओपनिंग वरवीं अलिरेझा आड रक्षात्मक खेळ केलो आनी खेळाच्या पयल्या टप्प्यांत आक्रमक खेळ करपी अलिरेझाच्या आक्रमणाक योग्य रितीन तोंड दिलें. ते उपरांत गुकेशान प्रतिस्पर्धी खेळगड्याच्या राजाचेर जबरदस्त आक्रमक करून 37 चालींनी जैत जोडलें. ह्या जैता सयत गुकेश लायव्ह संवसारीक रॅंकिंगेंत 2742 सयत 15वे सुवातेर पावलो.
गुकेशा खेरीत अमेरिकेच्या फाबियानो करुआनान येजमान देशाचो संवसारीक क्रमवारींत पयले सुवातेर आशिल्लो मॅग्नल कार्लसन हाका हारयलो. पयले फेरये उपरांत गुकेश आनी फाबियानो हांचे दरेकी तीन गूण जाल्यात आनी ते जोड रितीन पयले सुवातेर आसात.
नॅदरलॅण्डाच्या अनीश गिरीन उझ्बेकिस्तानाच्या अब्दुसत्तोरोव नोदिरबेकाक, अमेरिकेच्या वॅस्ली सोन आपल्याच देशाच्या हिकारू नाकामुरा आनी अजरबैजानाच्या शाखिरयार ममेद्यारोवान नॉर्वेच्या आर्यन तारी हाका क्लासीकल मॅची बादाबाद उरल्या उपरांत आर्मागेडन टायब्रेकरांत हारयलो. ह्या सगल्यांचे दरेकी 1.5 गूण जाल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
