श्रीकांत, सिंधू हारलीं

भांगरभूंय | प्रतिनिधी

भारताची दोन खेपेची ऑलिम्पीक पदक जैतिवंत पी व्ही सिंधू हिचें थायलॅण्ड ओपन बॅडमिंटन सर्तींतलें आव्हान सोंपलें. जाल्यार सायना नेहवाल, सात्विक-चिराग आनी लक्ष्य सेन हांणी आपआपल्या गटांत येस मेळयलें. पूण, किरण जॉर्जान सगल्यांचें लक्ष्य आपले वटेन ओडून घेतलें. प्रकाश पदुकोण अकादमींत प्रशिक्षण घेवपी किरणान दादल्यांच्या एकोड्या गटांत संवसारीक क्रमवारींत तिसरे सुवातेर आशिल्ल्या शी यू की हाका 21-18 आनी 22-20 अशा फरकांनी हारयलो.

मजगतीं, अंदूंच्या हंगामांत फॉर्मा खातीर झुजपी लक्ष्य सेनान पयले फेरयेंत चीनी तायपेच्या वांग के आड 21-23, 21-15 आनी 21-15 अशा फरकांनी हारयलो.

किरणान लेगीत आपली पयली आडखळ पार केली. पी व्ही सिंधूक निसट्टी हार घेवची पडली. तिका कॅनडाचे मिचेल ली आड 21-8, 18-21 आनी 21-18 अशा फरकान हार घेवची पडली.  तिचे खेरीत प्रियांशू राजवत, किदाम्बी श्रीकांत, साई परिणीत आनी समीर वर्मा लेगीत आपआपल्या गटांत हारले. समीराक डॅनमार्काच्या जोहानसना आड सरळ गेमींनी हार घेवची पडली. जाल्यार राजवताक मलेशियाच्या ते योंग कडल्यान 19-21 आनी 10-21 अशी हार घेवची पडली.

किदाम्बी श्रीकांताक अंदूंचो हंगाम अजून मेरेन बरो वचूंक ना. हे सर्तींत लेगीत ताचो बाबत फॉर्म कायम उरलो. ताका चीनाच्या वेंग होंग्यांग कडल्यान तीन गेमींनी हार घेवची पडली. 8-21, 21-16 आनी 14-21 अशा फरकान हारीक तोंड दिवचें पडलें.

बायलांच्या एकोड्या गटांत सायना नेहवाल आनी अश्मिता चालिहा हांणी जैतां जोडलीं. सायनान कॅनडाचे वे यू जेंग आड 21-13 आनी 21-7 अशा फरकांनी जैत जोडलें.

अश्मितान आपल्याच देशाचे मालविका बंसोडाक 21-17 आनी 21-14 हारयली. दादल्यांच्या दोट्टी गटांत चिराग शेट्टी आनी सात्विक साईराज रंकिरेड्डी हे जोडयेन फुडले फेरयेंत सुवात मेळयली. तांणी डॅनमार्काचे जोडयेक 21-13, 18-21 आनी 21-18 अशा फरकान हारयली. बायलांच्या दोट्टी गटांत मात भारताक हार घेवची पडली. आश्विनी भट आनी शिखा गौतम ही जोडी हारली. कोरियाचे जोडयेन तांकां 11-21 आनी 6-21 अशा सरळ गेमींनी हारयली. मिश्र गटांत भारताची जोडी पात्रताय फेरयेंतूच हारिल्ली.