शिक्षकांचो दिश्टीकोन व्हड जाय

भांगरभूंय | प्रतिनिधी

रमेश तवडकारः शिक्षक प्रशिक्षण वर्गाचें उक्तावण

भांगरभूंय । प्रतिनिधी

काणकोणः शिक्षण संस्थेंतल्यान शिकून गेल्ले विद्यार्थी खंय आसात, कितें करतात हाचो विचार करपाक जाय. शिक्षकांचो दिश्टीकोन व्हड जाय. सगळे शिक्षक उर्जावान जावपाक जाय. विवीध विशयांचेर आपलें योगदान शिक्षण संस्थेक अपेक्षीत आसता, अशें सभापती रमेश तवडकारहांणी सांगलें.

आमोणेंच्या श्री बलराम शिक्षणीक संस्थेच्या वर्सुकी शिक्षण प्रशिक्षण कार्यावळींत तवडकार उलयताले. 31 मेक तांणी प्रशिक्षण शिबिराचे उक्तावण केलें. ह्या वेळार माचयेर बलराम निवासी शाळेची मुख्याध्यापक सविता तवडकार, बलराम डे- कॅर विद्यालयाचे मुख्याध्यापक अशोक गांवकार, बलराम उच्च माध्यमीक विद्यालयाची प्रभारी कविता नायक गांवकार, संस्थेचे सचीव जानू तवडकार हाजीर आशिल्ले.

सुरवेक भारतमातेचे प्रतिमेक फुलांचो हार घालून आनी दिवली पेटोवन शिबिराचें उक्तावण केलें. शिक्षक श्रीकांत तवडकार, वंदना गांवकार, सरला गांवकार, दामोदर वेळीप हांणी येवकार दिलो.

बलराम शिक्षणीक संस्थेच्या शिक्षकां खातीर दर वर्सा शिक्षणीक वर्साचे सुरवेक तीन दिसांचें प्रशिक्षण वर्ग घेतात. अंदूंय हो वर्ग 31 मे ते 2 जून मेरेन चलतलो.

ह्या प्रशिक्षण वर्गांत 1 जूनाक महाराष्ट्रांतले नामनेचे दोळ्यांचे तज्ञ डॉ. दिलीप पटवर्धन मार्गदर्शन करतले. सुत्रसंचालन जानू तवडकार हांणी केलें जाल्यार कविता नायक गांवकार हांणी उपकार मानले.