भांगरभूंय | प्रतिनिधी
निलेश टोपलेः दिवचल सम्राट क्लबान भेटयलें शिक्षणीक साहित्य
भांगरभूंय । प्रतिनिधी
दिवचलः दरेका भुरग्यान शिक्षण घेतना देरेके समस्येचेर जैत जोडून फुडें वचपाक जाय. वाठारांतल्यो समाजीक संस्था तांकां मजत करपाक तयार आसतात. आपल्याक मेळिल्ले कसलेय मजतीचो उपेग विद्यार्थ्यांनी आपली कारकीर्द घडोवपा खातीर करचो. फुडारांत तांणीय हेरांक मजत करचे खातीर फुडाकार घेवचो, अशें दिवचल सम्राट क्लबाचे अध्यक्ष निलेश टोपले हांणी सांगलें.
श्री सद्गडेश्वरी देवस्थान मंडपांत लाखेरे वाठारांतल्या यत्ता धावी आनी बारावेचे परिक्षेंत पास जाल्ल्या विद्यार्थ्यांक पुस्तकां आनी चोपड्यो तशेंच हेर शिक्षणीक साहित्य वांटपाची कार्यावळ आयोजीत केल्ली. हे कार्यावळींत टोपले उलयताले.
ह्या वेळार दिवचल सम्राट क्लबाचे सचीव डॉ. प्रवीण सावंत, शेखर नायक, शिक्षक नितीन कवठणकार, रोहिदास गाड, शेखर साळकार, तशेंच लाखेरे गांवचे निलेश ताटे, रामा ताटे, दत्तगुरू ताटो आनी गांवचे लोक हाजीर आशिल्ले.
नगरसेवक आनी दिवचल सम्राट क्लबाचे अध्यक्ष निलेश टोपले दर वर्सा विद्यार्थ्यांक शिक्षणीक साहित्य पुरस्कृत करतात. अंदूं तांणीय आपल्या प्रभागांतल्या गरजेवंत विद्यार्थ्यांक शिक्षणीक साहित्य भेटयलें. लाखेरे गांवच्या वट्ट 14 विद्यार्थ्यांक वर्सभर लागपी शिक्षणीक साहित्य भेटयलें.
गरजेवंत विद्यार्थ्यांक शिक्षणीक साहित्य भेट दिल्ले खातीर निलेश ताटे हांणी दिवचल सम्राट क्लबाचे उपकार मानले. निलेश टोपले हांणी येवकार दिलो, डॉ. प्रवीण सावंत हांणी सुत्रसंचालन केलें जाल्यार शेखर नायक हांणी उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
