भांगरभूंय | प्रतिनिधी
नुस्तेमार संघटणाः खात्याची आडनदर चलिल्ल्याचो आरोप
भांगरभूंय । प्रतिनिधी
मुरगांवः पश्चीम दर्यादेगे वयली मान्सून नुस्तेमारी बंदी खरपणान चालीक लावची आनी ही बंदी 90 दिसां मेरेन वाडोवची, अशी मागणी राष्ट्रीय नुस्तेमार संघटणटेन केल्या.
गोंयचो रापोणकारांचो एकवोट, राष्ट्रीय नुस्तेमार संघटणा आनी हेर संघटणां सयत खारीवाडो वास्कोच्या पोरण्या क्रॉस ऑफिसांत संबंदितांनी पत्रकार परिशद घेतिल्ली. ह्या वेळार राष्ट्रीय नुस्तेमार संघटणेचे सचीव ओलेन्सियो सिमोईश, गोंयचो रापोणकारांचो एकवटाचे उपाध्यक्ष कॅमिलो सौझा, क्रिस्तोद डिसोझा आनी हेर मानेस्त हाजीर आशिल्ले.
ओलेन्सियो सिमोईश हांणी सांगलें, मान्सूनांतली नुस्तेमारी बंद खऱ्या अर्थान चालीक लायनाशिल्लें गोंय हें एकसुरें राज्य आसा. ताका लागून आमी दर्यांतली प्रजाती वगडायतात. हे बाबतींत नुस्ते वेवसाय विभाग घाळपणान वागलें जाल्यार गोंयच्या दर्यादेगेर रावपी नुस्तेमार भावांक तो वाठार सोडून दुसरे कडेन वचचें पडटलें. कारण भारतांत 8,118 किलोमिटराची दर्यादेग आसा. 3,827 परस अदीक नुस्तेमारी करपी गांव आसात. 1914 परंपरीक नुस्तें लँडींग केंद्रां आसात. भारत हो संवसारांतलो नुस्त्याचो मुखेल गिरायक आनी पुरवणदार आशिल्ल्यान नुस्तें मेळपाचें प्रमाण उणें जाला. ते खातीर मान्सूनांतली नुस्तेमारी बंदी वाडोवप गरजेचें आसा, अशें सिमोईश हांणी सांगलें.
नुस्तेमार भावांनी कायदो हातांत घेवचे आदीं मालप्यांचे बेकायदो हायस्पीड ट्रॉलर्सांक राज्याच्या प्रादेशीक उदकांत प्रवेश करपाक बंदी घालची, अशीय मागणी राष्ट्रीय नुस्तेमार संघटणेन केल्या. एलईडी लायट नुस्तेमारीचेर बंदी लागू करपाक अपेशी थारिल्ले खातीर गोंयचो राणोपणकारांचो एकवोटचे उपाध्यक्ष कॅमिलो सौझा हांणी विभागाक शिटकावणी दिल्या. जी बंदी राज्य सरकारान 2916 त लागू केल्ली आनी ते उपरांत केंद्र सरकारान लागू केल्ली, त्या कायद्याचो भंय बाळगिनासतना बिनधास्त एलईडी लायट नुस्तेमारी चल्ल्या. खूब खेपे आवाज काडून लेगीत नुस्तेमार विभागान हाचे कडेन आडनदर केल्या, असो आरोप तांणी केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
