भांगरभूंय | प्रतिनिधी
केरी- सत्तरीः सांखळी बेळगांव म्हामार्गा वयलो घोटेली नं. 1 केरी- सत्तरी वाठारांतलो पूल घातक जाला. पुलाचो एके वटेंतलो भाग नेमता.
हो पूल खूब आदीं बांदिल्लो. तो वयल्यान पळोवपाक बरो दिसता, पूण भितरल्यान खूब कडेन पोखरला. हो पूल 1965त 1 लाख 10 हजार रुपयांची निविदा काडून बांदिल्लो.
ह्या पुला वयल्यान अवजड वाहनां येरादारी करतात. ताका लागून ह्या पुलाचो धोको आनीक वाडला. ह्या पुला वयल्यान तांकी परस चड वजनाचीं वाहनां येरादारी करतात. दिसान दीस वाहनांची संख्या वाडत आसा. फाटल्या कांय म्हयन्यां सावन ह्या पुलाचो एके वटेंतलो भाग इल्लो इल्लो सकयल देंवता. पावसाळ्यांत तो असोच दवरलो जाल्यार रस्त्या पोंदची माती वचून तो कोसळपाची शक्यताय आसा.
अतिगतीन धांवपी वाहनांक लागून पुलाक धपके बसतात आनी ताकाच लागून तो दुबळो जाला. खंयच्याय खिणाक पुलाचो नेमपी भाग कोसळपाक शकता वा रस्तो कोसळपाक शकता, अशी परिस्थिती आसा. सध्या ह्या रस्त्याचेर पडिल्ली वेर स्पश्ट दिसता.
राती वेळार व्हड प्रमाणांत अवजड वाहनांची येरादारी चालू आसता. वयल्यान हॉटमिक्स डांबरीकरण केल्ल्यान नेमिल्लो भाग वाहनचालकांच्या लक्षांत येना. ताका लागून एकादी दुर्घटणा घडूं येता. आतां पावसाळो सुरू जातलो. पावसाक लागून तो आनीक नेमपाची शक्यताय आसा.
बेळगांवा वचपा खातीर हो लागींचो मार्ग आशिल्ल्यान खूब जाण ह्याच मार्गाचो वापर करतात. ह्या पुलाचे सुवातेर नवो पूल बांदपाची गरज आसा. हे संबंदांत पांच- स म्हयन्यां आदीं केरी पंचायतींत थाराव घेवन भौशीक बांदकाम खात्याक धाडिल्लो, पूण ह्या पुलाचो प्रस्ताव राष्ट्रीय म्हामार्गा खातीर धाडला.
मजगतीं, थळावी आमदार डॉ. देविया राणे हांचे नदरेक ही गजाल हाडून दिल्या. डॉ. राणे हांणी केरीची सरपंच दीक्षा गांवस, थळावे पंच तन्वीर पांगम आनी हेर पंचायत मंडळा वांगडा पुलाची पळोवणीय केल्या. हो विशय आपूण विधानसभेंत मांडटली, अशें तांणी सांगलें. ह्या पुला बदला पर्यायी रस्त्याची वेवस्था करप गरजेचें आसा. हो पूल मोडलो जाल्यार वचपाक दुसरो रस्तो ना. न्हंयेक उदक आसलें जाल्यार येरादारीची धांदल जातली. नवो पूल बांदचे आदीं ह्या पुलाची ताकतिकेन पळोवणी करून ताची तात्पुरती दुरुस्ती करची, अशी मागणी थळाव्या लोकांनी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
