भांगरभूंय | प्रतिनिधी
संजय तेंडुलकार:वांते नवचेतना प्रगती मंच संस्थे वतीन सावरकर जयंती
वाळपय : विनायक सावरकर हो स्वातंत्र्य चळवळीचो भगभगपी उजो. खुबश्या संघर्शाक तोंड दिवन ताणीं स्वताची काळजी घेनासतना ब्रिटीशांआड सतत प्रसार केलो. अशा स्वतंत्र सैनिकांचे विचार आयचे तरणाटे पिळगे मेरेन पावप तितलेंच म्हत्वाचें. एक उग्र देशभक्त आनी स्वातंत्र्यसेनानी म्हणून वळखपी विनायक सावरकराची देख सगळ्यांनी पाळची अशें दिवचल शांतादुर्गा उच्च माध्यमिकांतले शिक्षक संजय तेंडुलकार हांणी स्पश्ट केलें.
वांते सत्तरी हांगच्या वाचनालयांत आयोजीत सावरकर जयंती कार्यावळींत तेंडुलकार हे मुखेल सोयरे ह्या नात्यान उलयताले.
नवचेतना प्रगती मंच हे संस्थे वतीन हे कार्यावळीचें आयोजन केल्लें. ह्या वेळार माचयेर लक्ष्मण आंबेशकर, भिरोंडा पंचायतीचे आदले सरपंच नितीन शिवडेंकार ह्या वेळार हाजीर आशिल्ले.
आदले सरपंच नितीन शिवडेकार हांणी ही संस्था दरवर्सा खुबशे उपक्रम हातांत घेता. भुरग्यांक माची उपलब्ध जावचे खातीर विवीध सर्ती आयोजीत करून भुरग्यांचे कुशळटायेक उर्बा दिवपाचो यत्न करता. समाजांतल्या विवीध घटकां कडल्यान बरे तरेचें सहकार्य मेळटा. सरकाराच्या विवीध येवजण्यांचो फायदो कोणशाकोणशानी पावचो देखून विशेश योगदान दितले, अशें तांणी सांगलें.
येवपी काळांत भुरग्यां खातीर ‘म्हजो देश म्हजें कर्तव्य’ ह्या विशयाचेर आदारून निबंध सर्त घेतले. तशेंच भुरग्यांची माची उपलब्ध जावचे खातीर सुत्रसंचालन कार्यशाळेचें आयोजन करतले, अशी म्हायती नितीन शेवडेकार हांणी दिली. ह्या वेळार वीर सावरकर हांच्या फोटोक फुलांचो हार अर्पण केलो.
ह्या वेळार खुबश्या मानेस्तांनी विनायक दामोदर सावरकार हांच्यो यादी सांगल्यो. पुराय कार्यावळीचें सुत्रसंचालन समृद्धी गणपुले हांणी केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
