भांगराळें गोंय संस्थेचे पुरस्कार शेनवारा भेटयतले

भांगरभूंय | प्रतिनिधी

पणजी: भांगराळें गोंय ही संस्था फाटल्या तीन वर्सां सावन सुमती रामा नायक हौशी उत्सवी नाट्य सर्तीचें आयोजन करता. अंदूंचे चोवथे नाट्य सर्तींतलीं इनामां आनी संस्थेचे प्रतिश्ठीत अशे ’भांगराळो गोंयकार पुरस्कार’ आनी स. नित्यानंद नायक हांच्या उगडासान ’नित्य युवा पुरस्कार’ येवपी 3 जुनाक मडगांव रवींद्र भवन हांगा भेटयतले. 

अंदूंच्या भांगराळो गोंयकार पुरस्काराचे मानेली साहित्य, शिक्षण, संस्कृतीक मळावेलें गुरुतुल्य व्यक्तीमत्व कमलाकर म्हाळशी आनी कोंकणीचे युवा संघटक, संयोजक, लेखक, समालोचक युगांक नायक हांकां ‘नित्य युवा पुरस्कार’ जाहीर जाल्यात. तांकां खासा सुवाळ्यांत हे पुरस्कार भेटयतले. 

भांगराळो गोंयकार पुरस्कार मानेली कमलाकर म्हाळशी हे गोवा कोंकणी अकादमीचे आदले सहाय्यक सचीव म्हणून कर्यरत असतना तांणी कोंकणी भास, शिक्षण, साहित्य, संस्कृती ह्या मळार रचनात्मक सेवा दिल्या. कोंकणी भाशा मंडळाच्या कोंकणी शिक्षक सनद, कोंकणी अकादमीच्या कार्यशाळांचे प्रशिक्षक म्हणून तांणी बरी सेवा दिल्या. आकाशवाणी, दूरदर्शन, वृत्तपत्रा वरवीं संस्कृती, शिक्षण, भाशा, समाज हे विशय सतत लोकां मुखार मांडल्यात. 

’मनीसजिणेचो ताज जमनालाल बजाज’, ’ऋतूचक्र’, लक्ष्य सांबशीव (अनुवाद) ’गावन काणी’, ’गणेश शारदा’, ’था थै था’ अशी तांची साहित्य संपदा आशिल्ल्यान तांणी ॐ श्री दत्त पद्मजा प्रकाशना वरवीं साहित्यिकांचें साहित्य प्रकाशीत केलां. लोककला आनी लोकसंस्कृतायेचे संकलक, अभ्यासक, नाट्यलेखक, दिग्दर्शक हाचे वरवीं रंगभुमीची सेवा केली. काणकोणच्या राज्यनाट्य महोत्सव, कोंकणी साहित्य संमेलन, युवा महोत्सव, राष्ट्र एकता की आवाज अश्या साहित्यीक आनी कलात्मक उत्सवांत प्रत्यक्ष अप्रत्यक्षपणान तांचो वांटो आनी मार्गदर्शन फावो जालां. 

काणकोण कोंकणी कला केन्द्र, कोंकणी नाटक संगीत अकादमी अशा म्हत्वाच्या संस्थांच्या कार्यांत ते सक्रीय आसात. कोंकणी लोकगीत परंपरा दर्शन आनी गावन काणी, गुडूल्या पदां, बाशी पुनवे पदां संकलीत केल्ल्यान तांचें राज्य तशेंच राष्ट्रीय माचये वरवीं सादरीकरण केलां. तांकां न. दा. नायक पुरस्कार, कुळागर पुरस्कार, कोंकणी भाशा मंडळ शिक्षक, सेवा, बाल साहित्य पुरस्कार, स. रामनाथ मथा पुरस्कार, गोंय राज्य संस्कृतीक पुरस्कार आनी हेर कोंकणी सेवे खातीर अस्मिताय प्रतिश्ठान पुरस्कार, मोहिनी पुरस्कार तांकां भेटोवन तांच्या कामाची दखल संस्थांनी तशेंच मानेस्तांनी घेतल्या. 

भांगराळें गोंय अस्मिताय पुरस्कृत कोंकणी युवा संघटक स. नित्यानंद नायक हांचे यादीक समर्पीत केल्लो ‘नित्य युवा पुरस्कार 2023’ हो युवा संघटक, समन्वयक आनी लेखक युगांक नायक हांका जाहीर केला. सक्रीय, उच्च शिक्षणीक आनी वैचारीक संसाधन निर्माण करप हें युवा चळवळीचे नदरेन युवकां खातीर ’परिक्रमा’ ह्या महोत्सवाचें सुमार 10 वर्सां सावन आयोजन करता. विद्यार्थी आसतना सावन ते कोंकणीच्या हक्का खातीर चळवळी आनी संघटणांनी ते सक्रीय आसात. तांणी युवा महोत्सवाचे सहसंयोजक म्हणून काम पळयलां. ते कोंकणी विशीं चिंतनशील आनी विश्लेशणात्मक लेखक तशेंच परराष्ट्र धोरण, राजकीय आनी सामाजीक विशयाचेर स्तंभलेखन करतात. कोंकणी अस्मिताये संबंदी कार्या खातीर अस्मिताय प्रतिश्ठान संस्थेचो 2014चो ’युवा अस्मिता पुरस्कार’ तांकां फावो जाला. तशेंच ’आंतराष्ट्रीय चलचित्रां नियाळ समिक्षा’ ह्या कोंकणी पुस्तका खातीर डॉ. टी. एम. ए. पै पुरस्कार ताका मेळ्ळा. सध्या गोंय विद्यापीठांत आंतरराष्ट्रीय आनी क्षेत्रीय अभ्यासा विशीं आंतरराष्ट्रीय अभ्यासाचे सहाय्यक प्राध्यापक म्हणून ते कार्यरत आसात.

मडगांव रवींद्र भवनांत सांजेवेळार 4 वरांचेर जावपी खासा कार्यावळींत कोंकणीचे ज्येश्ठ साहित्यीक, कवी, गितकार अ‍ॅड. उदय भेंब्रे मुखेल सोयरे म्हणून हाजीर रावतले. तशेंच स्मार्कलिंक ग्रूप कंपनीचे अध्यक्ष कमलाक्ष रामा नायक हे अध्यक्षपदार हाजीर आसतले.