भांगरभूंय | प्रतिनिधी
भांगरभूंय । प्रतिनिधी
वास्कोः मुरगांव बंदर प्राथिकरणाच्या (एमपीए) विस्तारीकरण येवजणेक पारंपरीक नुस्तेमाऱ्यांच्या संघटनांनी खर विरोध केला. बंदराची हद्द अधिसूचीत करपाची मागणी तांणी सरकारा कडेन केल्या तशेंच बंदरांत कोळसो हाताळणींत वाड करपाची मागणी करपी कोळशो कंपनीच्या मागणेक राज्य सरकारान तेंको दिवचो न्हय अशें तांणी सांगलां.
लिव्हिंग अर्थ फावंडेशनात सोमार 29 मेक मुंरगांव तालुक्यांतल्या नुस्तेमाऱ्यां खातीर प्रशिक्षण कार्यशाळा आयोजीत केल्ली. त्या वेळार तांणी बंदर विस्तारीकरण येवजणेक विरोध केलो. जेएसडब्ल्यूच्या विस्तारीकरण येवजणेक वेगवेगळ्या नुस्तेमारी संघटनांनी हाचे पयलींच आव्हान दिलां अशें गोंयच्या रांपणकारांचो एकवोटाच्या ऑलेन्सियो सिमोईश हाणे सांगलें. पर्यावरणाचेर जावपी परिणां विशीं सारको अहवाल तयार करूंक नाशिल्ल्यान एमपीएत जाय तशी कोळसो हाताळणी चल्ल्या असो आरोप ताणे पत्रकारां कडेन उलयतना केला.
धा किलोमीटर वाठारांतली नुस्तेमाऱ्यांची घऱा, नुस्त्यांची तांतया घालपाची सुवात, नुस्तेंमारी विभाग हे विशीं पर्यावरण परिणाम (ईआयए( अहवालांत कसलीच नोंद केल्ली ना. बंदरांतल्या कोळसो हाताळणेक लागून लोकांक त्रास जातात तरी बंदरांत कोळसो हाताळणी विस्तार येवजणेक राज्य सरकार कशी परवानगी दिवपाक शकता. स्टील प्रकल्प कर्नाटकांत आसात. गोंयच्या लोकांनी कोळश्या खातीर कित्याक त्रास काडप. कर्नाटकांतल्या स्टील प्रकल्पां खातीर गोंय हें कोळसो केंद्र कित्याक करप.पुराय गोंयच्या पर्यावरणाचेर ह्या कोळश्याचो वायट परिणान जातलो. मुंरगांव तालुक्यांतल्या चार आमदारांक तशेंच मुख्यमंत्री डॉ प्रमोद सावंत हांका कोळसो हाताळणेक अजिबात तेंको दिनाकात अशें आमी मागतात, अशें सिमोईशान सांगले.
मुरगांव पोर्ट ट्रस्टाचें रुपांत बंदर प्राधिकरणात करून दर्यांत 5 नॉटीकल मैल आनी भरती रेशे पसून 20 मीटर अशी तांची मर्यादा केल्या. ताका लागून दर्या देग वाठारांल्या नुस्तेमाऱ्यांची घरां वतलीं आनी तांका नुस्ते वेवसाय करपाक मेळचो ना. गोंय सुपुल्लें आशिल्ल्यान गोंय सरकारान ही हद्द रद्द करपाक जाय. सध्या बंदर प्राधिकरणाचे मर्यादेंत गोंयचो 50 टक्के वाठार येता. मर्यादा थारावचे पयलीं गोंय सरकारान सारको अभ्यास करपाक जाय. बंदर विस्तारीकरणाचो परिणान सगल्यांत चड नुस्तेमारी आनी पर्यटन वेवसायाचेर जातलो अशें ताणे सांगलें.
एमपीए विस्तारीकरणाची येवजण फाटीं घेवची अशी मागणी करपी निवेदन आमी केंद्रीय नुस्ते वेवसाय मंत्री पुरुषोत्तम रुपाला हांका दिलां. एमपीए विस्तारीकण, बर्थ विस्तारीकरण आनी ड्रेजींग, आनी खारीवाडो हांगच्या जेएसडब्ल्यू विस्तारीकरण पारंपरीक नुस्तेमाऱ्यांचो विरोध आसा. एमपीए ड्रेजींगा आड आमी हाचे पयलीं राष्ट्रीय हरित लवादा कडेन कागाळ केल्ली अशी म्हायती ओल्ड क्रॉस कॅनोय धनी सहकारी सोसायटीचो अध्यक्ष कुस्तादियो डिसोझान सांगल
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
