स्वताचेर जैत मेळोवप हें व्हडलें येस

भांगरभूंय | प्रतिनिधी

धर्माचो खरो अर्थ जाणून घेवप गरजेचें. जायते जाण धर्म मानतात, पूण ताच्या अर्थाचे खोलायेन वचनात. पूण व्हड संतांनी आनी भारतीय संस्कृतायेन नेमां प्रमाण पाळिल्ल्या आचरणाक धर्म, अशें म्हणलां. धोरण आनी नेम म्हळ्यार धर्म ही संतांनी दिल्ली खूब म्हत्वाची व्याख्या. तिचो दरेकल्यान अणभव घेवपाची गरज आसा. सगल्यांनी धर्मा प्रमाण, म्हळ्यार धोरण आनी नेमा प्रमाण वागपाक सुरवात करची. म्हणटकच समाजांतले जायते प्रस्न आपोआप सुट्टले. विचार करून वागपाचें थारायलें जाल्यार धर्माचें आचरण जाता आनी ताणांतल्यान सुटका मेळटा. धर्मगुरू दलाय लामा जुलय 1935 वर्सा तिबेटांत जल्मल्ले आनी ते फक्त तिबेटी लोकांचे अध्यात्मीक फुडारी न्हय, तर बौद्ध तत्वगिन्यांनाचे अधिकृत आवाजूय. तांचो शांती आनी सहअस्तित्वाचो पुरस्कार संवसारभर आयकतात आनी मानतात.
तांचे कांय विचार- तुमकां आवडटात तांकां उडपाक पांखां दिवचीं. तांकां परत येवपाक आनी सदांच तुमचे कडेन रावपाक कारणां दिवचीं. सुखाच्या सोदांत लोक वेगवेगळे मार्ग आपणायतात. तुमचे वांगडा तुमच्या मार्गार कोण ना जाल्यार तो चुकीच्या मार्गाचेर आसा, असो अर्थ जायना. आमच्या सद्याच्या काळांत करुणा परस व्हडली क्रांती कितें आसूं येता?
हजार झुजां जिखलीं तरी ताचो कितें उपेग? सगळ्यांत व्हडलें येस स्वताचेर जैत मेळोवपांत आसता. आमचें ध्येय हेरां परस बरें जावप न्हय, तर आमी स्वताच पयलीं आशिल्ल्या परस बरें जावप. केन्ना केन्नाय मौन ही सगळ्यांत बरी जाप. सुख हें तयार केल्ले वस्ती सारकें न्हय. ताका दर दिसा आपल्या कामांतल्यान मेळोवचें पडटा. व्हड जोखीम घेनासतना मोग आनी व्हड येस केन्नाच मेळूंक शकना, हें सदांच लक्षांत दवरात. शक्य आसल्यार उदार रावपाचो यत्न करात. आनी तें सदांच शक्य आसता. एक गजाल सदांच याद दवरात, केन्ना- केन्ना तुमकां जाय तें मेळना ही नशिबाची गजाल आसूं येता. तुमी जितले मोगान काम करतात तितलेच निर्भय आनी मेकळे जातात. नेम बरे तरेन समजून घेयात. कारण जेन्ना तुमी ते मोडटात तेन्ना तुमी तें प्रभावीपणान करूंक शकतात. मोग आनी करुणा ही ऐशोआरामाची गजाल न्हय. त्यो आमच्यो मुळाव्यो गरजो. तांचे बगर मनीसपण जियेवंक शकना.
ताण वाडत आसा
आयच्या वेगान चलपी जिणे पद्दतींत ताण वाडत आसा. राजकारण, समाजीक कारणां आनी हेर सर्तीच्या ह्या युगांत सगळेच जियेवपा खातीर धांवतात तशेंच नकारात्मक विचारूय चड खर जावपाक लागल्यात. पूण, ह्या विचारांक लागून आमी आमचे उदरगतींत आडमेळीं निर्माण करतात हें लक्षांत दवरूंक जाय. जिवीत सुखान जगपाचें आसल्यार सकारात्मक विचार करप खूब म्हत्वाचें. ताका लागून जिवीत संतुळीत आनी अर्थपूर्ण जाता. पूण, नकारात्मक विचार आमकां फाटल्यान ओडटात आनी तातूंत गुंतून आमीं आमचे उदरगतींत आडमेळीं निर्माण करतात.
एक व्हडलो फरक म्हणल्यार आशावादी लोकांक दरेका संकश्टांत संद दिसता आनी निराशावादी लोकांक संदींनी संकश्ट दिसता. ह्या निराशावादी विचारांतल्यान भायर सरले उपरांत सगळे कडेन संद दिसपाक लागतली आनी तुमचें जिवीताचे मार्ग बदलतलें. सुख भायर न्हय तर आमच्या भितरच आसता आनी ल्हान ल्हान खिणांनी तें मेळटा. खंयचेंय काम करतना मनशांन
नम्र जावंक जाय. कसलीच अपेक्षा करिनासतना, कसलोच
हेतू मतींत घेनासतना निरपेक्ष वृत्ती आनी सादेपणान, नमळायेन वागप.
संवसारांतली पयली काळजाची प्रत्यारोपणाची शस्त्रक्रिया येसस्वीपणान केल्ले दो. ख्रिस्टन बर्नार्ड हाची एक बरी देख आसा. तांकां एक फावट पत्रकारान विचारिल्लें की दोतोर, तुमी अशक्य आशिल्लें ते शक्य करुन दाखयलें. शेंकड्यांनी शस्त्रक्रिया करून तांणी दुयेंतींक एक नवी जीण दिली. तांणी आपले शस्त्रक्रिया कुशळटायेन जायत्या जाणांचे जीव वांटायले. हाचो अर्थ कितें? दोतोरान तांका सांगलें, ‘हांवें शेंकड्यांनी दुयेंतीचो जीव वांटायलो अशें म्हाका दिसना. फकत म्हजी कुशळटाय आनी गिन्यान एकठांय करपाचो यत्न केलो. जीव वाटावंक हांव कोण? जीव वांचोवपी एकलोच देव. तुमी जिवीत वाचवपी गजाल काडल्या
जाल्यार फकत एका बोकडाचो जीव वाटावपाचें श्रेय हांव घेवंक शकता. एकदां आफ्रिकेंत एका आदिवासी भुरग्यांक चड जोर येतालो.
५ ते ६ दीस वखद दिल्या उपरांत लेगीत तो बरो जायना. मागीर तांणी अंधश्रद्धेंतल्यान एक बोकड बळी दिवपाचें थारायलें. ताचेर हांवें ताका विनवणी केली की हांव आनीक 2- 3 दीस वखद दिवन पळयता. ते मेरेन बोकडाचो बळी दिवचो न्हय. निमाणें ताणें तें मान्य केलें. दोन दिसांनी जोर उणो जालो. तो भुरगो बरो जालो. देखून बळी रद्द जालो आनी बोकडाचो जीव वाटावलो. ताका लागून जिवीत वांचवपाचें श्रेय म्हजे परस देवाचें. मनशाच्या अभिमानाचो नाश जाले बगर अशी नमळाय येवंक शकना. कायम हांसत रावपाक शिकचें. वागणुकेंत एके रातींत बदल जायनात, ताका वेळ लागता, हें जाणून घेयात.

गजानन बा. नायक भाटकार
आल्त पर्वरी