भांगरभूंय | प्रतिनिधी
क्रिकेटींतल्या ‘आयपीएला’ चे आयतारचे फायनली कडेन देशाचें लक्ष आसप तशें सभावीक आशिल्लें. चेन्नय सुपर किंग्ज आनी गुजरात टायटन्स हाचें मदली ही किताबी फायनल पावसान विघ्न हाडूंक नाशिल्लें जाल्यार जावपाचीय. पूण कित्याक कोण जाणा नियतीन ही फायनल जावपाक दिली ना आनी एका वेगळ्याच आयपीएल म्हणल्यार इंडियन पॉलिटिकल लिगाची फानयल देशानूच न्हय जाल्यार पुराय संवसारान पळयली. ही राजकी मॅच निमाणे मेरेन रंगली आनी विरोधी पक्षाच्या खेळगड्यांनी केल्ले हाराकिरीक लागून जें अपेक्षीत आशिल्लें तेंच घडलें. योगायोग असोय की जांची निमाणी सरशी जाली तांकां गुजरात टायटन्स म्हणल्यार अतिताय थारची ना. प्रधानमंत्री नरेंद्र मोदी हांणी ‘आयपीएला’चे हे राजकी मॅचींत विरोधकांक अस्मान दाखोवपाची एकूय संद सोडली ना. तांच्या वांगडी खेळगड्यांनी तांका निमाणे मेरेन नेटान वांगडो दिवन ही मॅच जिखपांत व्हडलो वांटो उखल्लो हें खरें आसलें तरी निमाणे ‘प्लेयर ऑफ द मॅच ‘ थारले ते मोदी हेच. ‘ आयपीएला’ चे हे वेगळे मॅचींनूय देशाची बरीच मनरिजवण जाली आनी आयपीएलाची खरी फायनल पावसाक लागून एक दीस लांबणेर पडिल्ल्यान जायत्या जाणांक बरें दिसलें. राजकी आयपीएलाचे फायनलीचेर आमी बहिश्कार घाल्लो असो दावो घडये काँग्रेस सयत कांय विरोधी पक्ष करतले वा आयजूय करतात, हें खरें आसलें तरी बहिश्कारा उपरांतूय आमीच ही मॅच जिखली हो तांचो दावो मात फटीचो थारता. आतां विरोधकांनीय सगलें हातांतल्यान निसरून वता हाची खातरजमा करून बहिश्काराचो मार्ग स्विकारपाचें हें थारयल्लें दिसपाक लागलां. मात आतां वेंचणुकांचेर विरोधक बहिश्कार घालचे नात मूं, अशी दुबावाची पाल चुकचुकल्यार ताचें अजाप दिसपाचें कारण ना.
नवीन संसद भवनाच्या उक्तावणा वयल्यान प्रधानमंत्री नरेंद्र मोदी हांची पुराय कोंडी करपाक चलिल्ल्या काँग्रेस सयत पंदरा- वीस विरोधी पक्षांनी निमाणे स्वताचेंच हांशें करून घेतलें तरी उठसूट बहिश्काराचो मार्ग आपणावन ईन मीन-तीन विरोधक नेमकें साध्य तरी कितें करतले, हो व्हड प्रस्न आसा. एके इतिहासीक घडणुकेचे साक्षीदार जावपाची संद तुमी वगडायतात हाचें सादें भान लेगीत तुमकां उरूं ना हें दुर्दैवी आसा. मोदी विरोधांत इतले कुड्डे जावपाची खऱ्यांनीच गरज आशिल्ली काय हाचो अंतर्मुख जावन विचार केल्यार विरोधाच्या नांवां खाला जें कितें केलें तें सगलें चुकीचेंच आशिल्लें हाचो साक्षात्कार जातलो. सुवाळ्याचेर बहिश्कार घालपाचो निर्णय घेतना विरोधकांची वैचारीक दिवाळखोरी चडूच अधोरेखीत जाली ते उपरांत नियोजन मंडळाचे बसकेचेर लेगीत बहिश्कार घालप म्हणल्यार तर वैचारीक दिवाळखोरीच म्हणपाक. जाता. ताका लागून विरोधक राजकी फायदो जावपाची आस्त बाळगून आसत जाल्यार तोय तांचो भ्रम थारपाक शकता. विरोधकां खातीर नवें संसद भवन आनी नियोजन मंडळाचे बाबतींत विरोध दाखोवपाक तशें जायते मार्ग आशिल्ले, मात लोकसभेच्या आठ- णव म्हयन्यांचेर आशिल्ल्या वेंचणुकांचो धसको घेवन विरोधकांक बहिश्काराचें अस्त्र उबारपाचे अवदसेची याद आयली आनी तातूंत तांणी आपलोच घात करून घेतला, हाचेर दुमत आसपाक शकना.
नियोजन आयोगाचे बसकेचेर णव- धा राज्यांच्या मुख्यमंत्र्यांनी बहिश्कार घालपाचो जो निर्णय घेतलो ताका लागून जाल्यार ते नेमकें कितें करतात हाचो सादो विचार जरी तांणी केल्लो जाल्यार आपल्या राज्यांतल्या लोकांचेंच आमी केन्नाच भरून येवपाक शकचे नात इतलें व्हडलें लुकसाण करतात हें तांकां दिसताशिल्लें. कर्नाटक निकालाची पुनरावृत्ती आतां देशांत सगळे कडेन जातली, ह्या भ्रमांतल्यान हें सगलें जालां जाल्यार ताचें खूब व्हडलें मोल विरोधकांक मेजचें पडटलें, अशेंच तांच्या सध्याच्या पवित्र्या वयल्यान दिसता. नियोजन मंडळाचे बसकेक वांटेकार ना जावपा फाटल्यान विरोधी मुख्यमंत्र्यांनी दिल्ली सबब पळयल्यार तांचें एक एक फकत कारण ह्या शब्दा बगर हेर खंयच्याय शब्दांत ताचें वर्णन करपाक मेळचें ना. नियोजन मंडळाचे बसकेंत आमचें म्हणणें आयकून घेनात, असोय दावो कांय जाणांनी केला. तो लेगीत सामको पोकळ दिसपा सारको आसा. बसकेंत दरेका मुख्यमंत्र्याक ताच्या राज्याचें अर्थीक चित्र सामकार दवरचें पडटा, अशी परिस्थिती आसतना आमचें कोणूच आयकनात असो दावो करप म्हणल्यार ती फकत निमीत मात्र सबब थारता. आपापल्या राज्याचे उदरगती परस मोदी विरोधांत भायर रस्त्यार घोशणा दिवपाक हे फुडारी धन्यताय मानतात जाल्यार ताचेर आनी कितें सांगपाचें? नियोजन मंडळाच्या गव्हर्निंग कौन्सिलाचे बसकेंत नरेंद्र मोदी विकसीत भारताचे रुपरेशेचर म्हत्वाची चर्चा करतना ह्या मुख्यमंत्र्यांक तातूंत वांटो घेवप गरजेचें दिसना जाल्यार ताचे परस व्हड दुर्दैव तें कितें? मोदी हांकां आडावपा खातीर विरोधकांक जिवाचो आटापिटो करप हें एक फावट समजपाक शकता. मात वट्ट उदरगतीच्या विरोधांत घाणयारे राजकारण खेळपाचो हो प्रकार मात लोक सोंसून घेतले असो समज कोणे करून घेतल्यार तो चुकीचो थारपाक शकतलो.
संसद भवनाच्या उक्तावण कार्यावळीचेर बहिश्कार घाले उपरांत निदान विरोधकांनी ताचेर आक्षेप घेवपा सारकी टिप्पणी करतना संयम बाळगुपाची गरज आशिल्ली. पूण थंय लेगीत विरोधकांचे विचार दारिद्र्य दिसून आयलें. राजाराणीच्यो गोश्टी राहुल गांधी अजून आयकता दिसता. ताका संसद भवन उक्तावण कार्यावळ नरेंद्र मोदी हांचो राज्याभिशेक दिसलो. राष्ट्रीय जनता दलाक जाल्यार नवें संसद भवन म्हणल्यार कांयशांव दिशिल्ल्याचें तांचें ट्वीट सांगता. शरद पवारांक जाल्यार हो सुवाळो पळोवन मोदी देशाक चडून फाटीं व्हरतात असो भास जावपाक लागला. नरेंद्र मोदी हांकां परत सत्तेर येवपा पसून आडावपा खातीर विरोधकांनी खरें पळयल्यार नव्या संसद भवनाचे उक्तावण कार्यावळीक हाजीर रावन तांची म्हाएकी दाखोवन नव्या सभाघरांत आमीच सरकार स्थापन करतले हाची गवाय दिल्ली जाल्यार तें चड औचित्याक धरून आसताशिल्लें. पूण, बहिश्कारा बगर हेर खंयचेंय अस्त्र सध्या विरोधकांच्या भात्यांत आशिल्ल्याचें दिसना. मोदी आड तांची सामकी झपाटल्या भशेन अवस्था जाल्ल्या, अशें दिसता. उक्तावण सुवाळ्या सावन नियोजन मंडळाचे बसके मेरेन सगळे कडेन बहिश्कार हेंच अस्त्र तांणी उबारलां. लोकसभा वेंचणुका जाय मेरेन विरोधकांच्या ह्या पवित्र्यांत कांय बदल जातलो अशी आस्त बाळवप धाडसाचें थारतलें. भारतांत सरकार पक्ष आनी विरोधक हांचे मदली सध्याची तयार जाल्ली दरी पळयल्यार तांचे मदले एकजुटीचें चित्र आतां घडये लोकसभेच्या वेंचणुकां उपरांत संवसारा सामकार येवपाक शकतलें.
वामन प्रभू
9823196359
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
