भांगरभूंय | प्रतिनिधी
दिगंबर कामतः सोबितीकरणाच्या वावराक सुरवात
भांगरभूंय । प्रतिनिधी
मडगांवः मडगांवच्या फोमेंतो कार्यालया लागसारच्या रिंगरोड सावन उड्डाण पूल बांदतले. ते गांधी मार्केटा वयल्यान थेट अपोलो हॉस्पिटला कडेन जोडटले. सध्या ह्या कामाची तयारी मुळाव्या पांवड्याचेर आसा. अदमास पत्रक केलां आनी पुलाक मंजुरी मेळ्ळ्या. कन्सल्टंट नेमतले. फुडल्या दोन म्हयन्यां भितर प्रक्रियेक गती येतली, अशी आमदार दिगंबर कामत हांणी सांगलें.
गांधी मार्केटांतल्या सोबितीकरणाच्या कामाक आमदार कामत हांचे हस्तुकीं सुरवात केली. ह्या वेळार ते उलयताले.
अर्बन डॅव्हलॉपमेंट खात्याचो मडगांव पालिकेक निधी येता. पयल्या टप्प्यांत 18 ते 20 लाख रुपयांचो निधी मेळ्ळा. नगरसेवक सोनित आजगांवकार हांणी हो 18 लाखांचो निधी गांधी मार्केटांतल्या उदक येता थंय सुविधा दिवचे खातीर वापरपाचो थारायला. दुसऱ्या टप्प्यांत आनीक 18 ते 20 लांचें काम करपाक सांगलां. गांधी मार्केटांतलें काम केल्ल्यान पावसाळ्यांत विक्रेत्यांक आनी गिरायकांक थाकाय मेळटली, अशें कामत हांणी सांगलें.
दोन ते तीन प्रभागांची कामां मंजुरी खातीर धाडल्यांत. फुडल्या चार दिसांनी तीं मंजूर जावन येतलीं. गांधी मार्केटाचे उदरगती खातीर गरजेचे सगळे यत्न करतले, अशेंय कामत हांणी सांगलें.
विधानसभेंत पालिका मार्केटांतल्या दुकानांचो मुद्दो चर्चेक आयिल्लो. मार्केटांतलें एक दुकान एका मनशाच्या नांवार आसा आनी तें दुसऱ्याच मनशाक चलोवपाक दिता आनी तो आनीक तिसऱ्याच मनशाक तें दुकान दिता. ताचेर कारवाय करपाक गेल्यार तो व्हड मुद्दो जावपाक शकता. ताका लागून विधानसभेंत पालिका संचालनलया कडल्यान विधेयक मंजूर केलां. दुकान चलोवपाक सरकारान थारायिल्लें भाडें पालिके कडेन जमा करचें. हो दर थारावपाचें काम सरकारा वतीन सुरू आसा. जांकां सरकारान थारायिल्ली रक्कम दिवपाक जायना तांणी दुकान रितें करचें, अशें थारायलां. मडगांव पालिकेच्या मार्केटांतल्या दुकानांचो सर्व्हे आतां मेरेन 80 टक्के पुराय जाला, अशी म्हायती आमदार कामत हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
